АҚШ президенти Дональд Трампнинг махсус элчиси Стив Уиткофф ва Оқ уй раҳбарининг куёви Жаред Кушнер Ғазо секторини қайта тиклаш бўйича 112 миллиард долларлик таклиф ишлаб чиқди. Бу ҳақда The Wall Street Journal (WSJ) хабар бермоқда.
Таъкидланишича, “Тонг лойиҳаси” (Project Сунрисе) “вайрон қилинган анклавни гўзал метрополисга” айлантиришга қаратилган. Америка томонининг ҳисоб-китобларига кўра, бунинг учун 10 йил ва 112,1 миллиард доллар талаб этилади.
“Режада Ғазони тиклашни қайси давлатлар ва компаниялар молиялаштириши, шунингдек, қайта қуриш пайтида 2 миллион фаластинлик қаерда яшаши ҳақида аниқ маълумот берилмаган”, деб ёзади нашр.
Вашингтон ушбу лойиҳанинг асосий иштирокчиси бўлишга, “грантлар кўринишида 60 миллиард доллар ажратишни қўллаб-қувватлашга ва барча ишларни амалга ошириш учун қарзларнинг кафили бўлишга” тайёр эканлиги айтилмоқда. 10 йилдан сўнг Ғазо сектори тикланиш бўйича кейинги қадамларни мустақил равишда молиялаштириши ва пировардида кредитларни тўлашни бошлаши режалаштирилган.
“Таклиф билан “потенциал ҳомийлар, жумладан Форс кўрфазининг бой қиролликлари, Туркия ва Миср” аллақачон таништирилган”, деб айтди газетага исми ошкор этилмаган АҚШ амалдори.
Уиткофф, Кушнер ва яна бир неча амалдорлар сўнгги 45 кун давомида режа устида ишлаган ва Исроил, хусусий сектор вакиллари ҳамда пудратчилар билан маслаҳатлашган. Нашр маълумотларига кўра, АҚШ маъмуриятидаги айрим шахслар бу лойиҳага шубҳа билан қараган ва Фаластиннинг ҲАМАС радикал гуруҳининг қуролларини топширишга тайёрлигига ҳам, Вашингтоннинг бошқа мамлакатларни “урушдан кейинги хавфли ҳудудни юқори технологияли шаҳар майдонига айлантириш»га сармоя киритишга ишонтириш имкониятига ҳам ишонч билдирмаган.
2025 йил 6 октябрда Исроил ва ҲАМАС делегациялари Миср, Қатар, АҚШ ва Туркия воситачилигида Ғазодаги можарони ҳал этиш бўйича билвосита музокараларни қайта бошлади.
