Ҳукуматнинг йўл ҳаракати хавфсизлигини таъминлаш соҳасини рақамлаштиришга қаратилган қарори қабул қилинди. Бу ҳақда Адлия вазирлиги хабар қилди.
Қайд этилишича, Жамоат хавфсизлиги департаменти Йўл ҳаракати хавфсизлиги хизмати ахборот тизими “Маъмурий амалиёт” модули масъул вазирлик ва идораларнинг ахборот тизимларига интеграция қилинади.
2026 йил 1 февралдан бошлаб умумий вазни (юки билан) 44 тоннадан ортиқ юк автомобильлари, конлар, шахта ва карерларда қўлланиладиган махсус транспортлар, юридик шахсларга тегишли йўналишсиз таксилар, шунингдек, антиквар автомототранспортлар учун алоҳида серияли рўйхатдан ўтказиш давлат рақами белгилари жорий этилади.
Шу билан бирга, ишлаб чиқарилганига 50 йилдан ошган транспортлардан фойдаланиш, уларни қайта рўйхатга олиш тақиқланади. Улар давлат рўйхатидан чиқарилади. Автомототранспорт рўйхатдан ўтказилганлиги тўғрисидаги гувоҳномада мулкдорнинг манзилини кўрсатиш талаби ҳам бекор қилинади.
Уларни давлат рўйхатидан ўтказишда қуйидаги ҳужжатларни ваколатли органлардан идоралараро электрон ҳамкорлик орқали олиш йўлга қўйилади:
- автомототранспорт олди-сотди шартномаси;
- “Электрон онлайн аукционларни ташкил этиш” АЖ томонидан берилган аукцион баённомалари;
- давлат улуши мавжуд корхоналар томонидан ишлаб чиқарилган автомототранспортларга бериладиган электрон ҳисоб-маълумотлар;
- автомототранспорт воситаси мулкдорининг маълумотлари.
Аввалроқ Ўзбекистонда шаҳар транспорти ногиронлиги бўлганлар учун мослаштирилиши хабар қилинганди.
Шаҳар йўловчи транспортида фаолият юритувчи ташувчилар ногиронлиги бўлган шахслар ва болали йўловчилар учун зарур қулайликларни яратиши шарт бўлади. Хусусан, транспорт воситаларининг салонлари йўловчиларнинг хавфсиз чиқиб-тушишини таъминлайдиган тарзда жиҳозланиши талаб этилади.
Республика шаҳарларида ишлаб чиқарилганига 15 йилдан ошган автомобильларда таксичилик қилиш чекланиши мумкин.
Шаҳарда йўловчи ташиш билан шуғулланадиган йўналишсиз таксилар техник ҳолати ва жиҳозлари йўл ҳаракати хавфсизлигини таъминлаш бўйича қонунчилик талабларига мос бўлиши шарт.
