Жиззах вилоятида ўзганинг шахсий фото ва видеоларини тарқатиш билан таҳдид қилиб, 10 миллион сўм талаб қилган талаба қўлга олинди. Бу ҳақда Ички ишлар вазирлиги хабар берди.
Қайд этилишича, Жиззах шаҳрининг “Тошлоқ” маҳалласида яшовчи фуқаро ички ишлар органларига мурожаат қилиб, фарзандига нисбатан ноқонуний ҳаракат қилган шахсга қарши чора кўришни сўраган.
Маълум бўлишича, шаҳарнинг “Обод” маҳалласида истиқомат қилувчи олий таълим муассасаларидан бирида таҳсил олувчи 2006 йилда туғилган талаба аризачининг фарзандига тегишли бўлган шахсий ва ошкор этилиши мумкин бўлмаган фото ва видео тасвирларни қўлга киритган. Ушбу шахс тасвирларни жабрланувчининг яқин қариндошлари ва танишларига тарқатиш билан таҳдид қилган ва уларни тарқатмаслик эвазига 10 миллион сўм талаб қилиб, ноқонуний равишда моддий манфаат олишга уринган.
Билдирилишича, гумонланувчи талаб қилган 10 миллион сўмни олаётган вақтида Жиззах вилояти ИИБ томонидан қўлга олинган. Текширув давомида унинг мобиль телефонида ариза муаллифига тегишли шахсий фото ва видео материаллар топилган. Шу боис бир дона телефон аппарати расмий равишда ҳужжатлаштирилган.
Ҳолат юзасидан Жиноят кодексининг 165-моддаси (товламачилик) иккинчи қисми билан жиноят иши қўзғатилиб, гумонланувчи процессуал тартибда вақтинча сақлаш ҳибсхонасига жойлаштирилган.
