Тошкент шаҳрида чет-эл фуқароси бошчилигдаги юзлаб йигит-қизлардан ташкил топган кибержиноятчилар гуруҳи қўлга олинди. Бу ҳақда Ички ишлар вазирлиги хабар берди.
Дастлабки маълумотларга кўра, тармоқ вакиллари хориж давлатлари фуқароларини юқори даромадли инвестиция ва криптовалюта лойиҳалари билан алдаб, уларнинг маблағларини ўзлаштириш билан шуғулланиб келган. Бунинг учун чет тилларни мукаммал биладиган ёшлар, нуфузли университет талабалари жалб қилиниб, уларнинг ҳар бири кунига юзлаб қўнғироқларни амалга оширган.
Тезкор тадбирлар давомида Тошкент шаҳрида иккита йирик колл-марказ фош этилган. Яшнобод туманида жойлашган бизнес марказларидан бирининг олтинчи қаватида ўтказилган тинтув-тергов тадбирлари давомида бинога жойлашиб олган колл-марказда жами 97 нафар шахс аниқланган. Мазкур шахсларнинг беш нафари эса чет эл фуқаролари.
Тезкор тадбирлар Яккасарой туманида ҳам давом эттирилган. Бизнес маркази биносининг 11-қаватида аниқланган навбатдаги колл-марказда 34 нафар шахс фаолият олиб бораётгани, уларнинг уч нафари эса чет эл фуқаролари эканлиги аниқланган.
Колл-марказларда бошқарувчи, ташкилотчи, ёрдамчи, жамоа сардорлари ва операторлар ойига 70 фоизгача даромад орттиришга қизиқтирувчи контентлар акс этган фишинг ҳаволалар тайёрлаб, Канада, Буюк Британия, Германия, Норвегия, Голландия, Дания ва бошқа хорижий давлатлар фуқароларига сохта рақамлар орқали қўнғироқ қилиб, трейдерлик ниқоби билан инвестиция тариқасида крипто-активларни ўтказма қилган.
Билдирилишича, ходимларни ишга жалб қилишда юқори конспирация қоидаларига амал қилиш юзасидан алоҳида ўқитилган ва хорижий фуқаролар билан тахаллуслар орқали суҳбатлашилган. Бинога кириш қатъий назорат остида амалга оширилиб, махсус қўриқчилар эшик олдида доимий фаолият олиб борган.
Ўтказилган тезкор тадбир давомида юқоридаги манзиллардан уюшган гуруҳ жиноий ҳаракатларни амалга оширишда фойдаланган 136 та компьютер, 90 та монитор, 73 та процессор ва 53 та моноблок, 320 та телефон аппарати, 128 та қаттиқ диск ва 175 та хотира қурилмаси, иккита сейф ва бошқа турдаги воситалар аниқланиб, ҳужжатлаштириб олинган.
Мазкур ҳолат юзасидан Ички ишлар вазирлиги Кибержиноятларга қарши курашиш департаменти тергов бошқармаси томонидан жиноят иши қўзғатилиб, дастлабки тергов ҳаракатлари олиб борилмоқда.
Маълум бўлишича, ушбу схемани ташкил этган шахс чет эл фуқароси бўлиб, у Ўзбекистон ҳудудидаги ноқонуний фаолиятини 1978 йилда туғилган Ўзбекистон Республикаси фуқароси билан ҳамкорликда амалга оширган. Жиноий уюшманинг мазкур икки раҳбари ва яна колл-марказ ноқонуний фаолиятининг асосий гумонланувчилари бўлган саккиз нафар шахс қамоққа олинган.
Шунингдек, яна 10 нафар гумондорлар қамоққа олинган ҳамда қолган 111 нафар шахс билан тезкор суриштирув ва тергов ишлари олиб борилмоқда.
