Сирдарё вилоятида вояга етмаган ўқувчи қизга шаҳвоний шилқимлик қилган мактаб маслаҳатчиси 5 суткага қамалди. Бу ҳақда Олий суд матбуот хизмати хабар берди.
Суд ҳужжатларига кўра, “Келажак” маркази ходими сифатида мактаб маслаҳатчиси лавозимида фаолият юритган эркак 16 ёшли 10-синф ўқувчисига таълим муассасасининг ижтимоий тармоқдаги саҳифасини юритиш масаласида мурожаат қилган. Шундан сўнг у тунги вақтларда Telegram мессенжери орқали қизга ишқий мазмундаги хабарлар юбора бошлаган. Қиз унинг хабарларига жавоб бермаган. Шундан кейин ҳуқуқбузар қизга қўнғироқ қилиб, ярим тунда кўчага чиқишни таклиф этган ва учрашишлари лозимлигини билдириб, шаҳвоний тусдаги ҳаракатларни амалга оширган.
Жабрланувчининг қонуний вакили сифатида иштирок этган унинг онаси таълим муассасасида фаолият юритувчи ходим томонидан бундай хатти-ҳаракатларга йўл қўйилиши мумкин эмаслигини билдириб, суддан унга нисбатан қонуний чора кўришни сўраган.
Судда эркак ўз айбини тан олмасдан, оиласи ва фарзандлари борлигини, ҳеч кимга ишқий мазмундаги хабарларни юбормаганини билдирган.
Бироқ Жиноят ишлари бўйича Ширин шаҳар суди тарафларнинг кўрсатмалари ҳамда тақдим этилган далилларни ўрганиб чиқиб, мактаб маслаҳатчисини Маъмурий жавобгарлик тўғрисидаги кодекснинг 41-1-моддаси (шаҳвоний шилқимлик қилиш) 1-қисмида назарда тутилган ҳуқуқбузарликни содир этган деб топган. Унга нисбатан 5 сутка маъмурий қамоқ жазоси тайинланган.
