АҚШ президенти Дональд Трамп 27 ноябрь куни америкалик ҳарбийлар олдидаги чиқишида Қўшма Штатлар катта миқдорда B-2 Spirit stels -бомбардимончи самолётларига буюртма берганини эълон қилди. Бу ҳақда Тhе Economic Times хабар берди.
Бу самолётлар Нортҳроп Грумман компанияси томонидан ишлаб чиқарилиб, улар йил бошида Эроннинг ядровий объектларига зарба бериш операциясида муваффақиятли қўлланилган эди.
“B-2 бомбардимончи самолётлари Эроннинг ядровий салоҳиятини ва таъминотини бутунлай йўқ қилган. Биз бу техникага яна жуда кўп миқдорда буюртма бердик, бунинг сабаби улар мутлақо ақл бовар қилмас даражада ажойиб ва бутунлай кўринмас”, деган Трамп.
Мазкур самолётлар 22 июнь куни Эронга амалга оширилган ҳужумда қўлланилган эди. Тахминан олти метр узунликдаги ракеталар ер остида чуқур жойлашган нишонларни ҳам йўқ қилишга қодир.
B-2 Spirit: Технология ва нарх
Расман B-2 Spirit номи билан танилган ушбу самолёт ёйилган қанот шаклига эга. У ҳам анъанавий, ҳам ядро қуролларини олиб юриш имкониятига эга бўлиб, стелс (кўринмаслик) технологияси туфайли душман ҳаво мудофаа тизимларига сезилмасдан кириб бора олади. Битта самолётнинг ўртача нархи 2 миллиард доллардан ошади. Техника оғирлиги 18 тонна бўлиб, 1970-йиллардан бошлан ишлаб чиқарилиб келинмоқда.
