“Тошкент” халқаро аэропортида катта миқдордаги ноқонуний заргарлик буюмлари аниқланди. Бу ҳақда “Тошкент-АЭРО” ихтисослаштирилган божхона комплекси ахборот хизмати хабар қилди.
Қайд этилишича, Тошкентдан Олмаотага учиб кетаётган фуқаро номига расмийлаштирилган йўл сумкаси рентген аппаратидан ўтказилганда, унинг ичида унинг темир асосига ёпиштирилган, лента кўринишидаги металл буюмлар борлиги аниқланиб, вақтинча сақловга олинган.
Фуқаро ушбу чемоданни танишидан олгани ва унда сариқ рангли металлдан ясалган буюмлар борлигини билмаганини айтган. Уларнинг тахминий оғирлиги 350 граммни, қиймати эса 549 миллион сўмни ташкил этмоқда.
Яна бир вазиятда Истанбулдан учиб келиб, яшил йўлак орқали ҳаракатланган шахснинг ички кийими ва пайпоғига жойлаштирилган, йўловчи божхона декларациясида кўрсатилмаган умумий оғирлиги тахминан 710 грамм бўлган, 833 миллион сўмлик заргарлик буюмлари борлиги аниқланиб, вақтинча сақловга олинган.
Туркиядан келган бошқа бир фуқаронинг ёнидан ҳам чўнтагига ва пайпоқларига яширилган 803 грамм, нархи 907 миллион сўмлик қимматбаҳо буюмлар аниқланган.
Ҳозирда барча вазиятлар юзасидан жиноят ишлари очилган.
