Жиззах, Бухоро ва Самарқанд вилоятларида хорижий давлатларга ишга юборишини айтиб фирибгарлик қилган уч киши ушланди. Бу ҳақда Бош прокуратура ҳузуридаги департамент хабар берди.
Департаментнинг Мирзачўл тумани бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда фуқаро А.Б. 10 минг доллар эвазига фуқаро З.И.ни гўёки юқори лавозимларда ишловчи танишлари орқали Исроилга ишлаш учун юборишини айтиб, келишилган пулдан 4 минг долларни олган вақтида ашёвий далиллар билан ушланган.
Департаментнинг Бухоро шаҳри бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда фуқаро Д.А. икки фуқаро — У.Р. ва А.Ж. ишончига кириб, уларни гўёки чет элда яшовчи танишлари орқали ишга жойлаштириб қўйишини айтиб, Болгария ва Литвага юбориш учун виза олиб бериши эвазига 3 400 доллар олган вақтида ашёвий далиллар билан ушланган.
Департаментнинг Самарқанд вилояти бошқармаси ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда “С.Т.” МЧЖ раҳбари О.А. фуқаро М.М.нинг ишончига кириб, уни 17 минг доллар эвазига Исроилга ишга юбориши учун “ишчи виза” расмийлаштириб беришини айтиб, олдиндан 2 минг долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 25, 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
