6 июнь тонгида Украина дронлари Россиянинг Санкт Петербург шаҳри ва Ленинград вилоятига ҳужум уюштирди. Бу ҳақда ҳудуд раҳбарлари маълум қилди.
Санкт Петербург губернатори Александр Беглов эрталаб аҳолини уйда қолишга ва зарурат бўлмаса кўчага чиқмасликка чақирди. Маҳаллий ОАВ маълумотларига кўра, бу губернатор томонидан дрон ҳужуми муносабати билан берилган илк шундай огоҳлантириш бўлган.
Ҳужум фонида шаҳарда мобил интернет ишлашида узилишлар кузатилган. Айрим ҳудудларда алоқа ва интернет хизматлари вақтинча чекланган.
Ленинград вилояти губернатори Александр Дрозденконинг билдиришича, ҳудуд осмонида 141 та дрон уриб туширилган. Дрон қолдиқлари Луга, Волосово ва Ломоносов туманларига қулаган.
Шунингдек, Болшая Ижора посёлкаси яқинида ёнғин юз бергани маълум қилинган. Бироқ расмийлар ёнғиннинг кўлами ва етказилган зарар ҳақида батафсил маълумот бермаган. Ҳалок бўлганлар ёки жабрланганлар ҳақида расмий ахборот йўқ.
“Астра” нашри гувоҳлар видеоларини таҳлил қилиб, ҳужумлар Ломоносов шаҳридаги денгиз қуроллари ишлаб чиқаришга ихтисослашган илмий-тадқиқот институти, Кронштадтдаги Денгиз кадетлар корпуси ҳамда Петергоф нефть базаси ҳудудларига қаратилган бўлиши мумкинлигини маълум қилди. Бироқ бу маълумотлар расмий равишда тасдиқланмаган.
