Россия ва Украина ўртасида шу йил давомида бўлиб ўтган тинчлик музокаралари натижа йўқлиги сабабли тўхтатилди. Бу ҳақда 11 ноябрда, Украина Ташқи ишлар вазири ўринбосари Сергей Кислица “The Times” газетасига берган интервьюсида маълум қилди.
Унинг сўзларига кўра, 2025 йил ёзидан бери Киев халқаро ҳамкорларни Россия Президенти Владимир Путинга босимни кучайтиришга ва Украина Президенти Владимир Зеленский билан шахсий учрашувга ундашга уриниб келган.
“Диктатура шароитида диктаторни намоён қилувчи музокара гуруҳлари билан самарали мулоқот олиб бориш мумкин эмас. Улар жуда қаттиқ мандатга эга ва уларга берилган йўриқномадан четга чиқолмайди”, деди Кислица, Истанбулда бўлиб ўтган Россия ва Украина делегациялари учрашувларига ишора қилиб.
Истанбулдаги музокаралар май, июнь ва июль ойларида уч босқичда ўтган. Украина шартсиз ўт очишни тўхтатиш ва фуқаролик инфратузилмасига зарбаларни тўхтатишни талаб қилган. Россия Президенти ёрдамчиси Владимир Мединский бошчилигидаги россиялик делегация эса сулҳдан бош тортган ва Москва аннексия қилган ҳудудларнинг тан олинишини, шунингдек, Украина қуролли кучлари сонини чеклашни талаб қилган.
Кислица интервьюси чоп этилгандан кейин, Россия ТИВ Кремль Туркияда музокараларни қайта бошлашга тайёрлигини билдирди.
“Туркиялик вакиллар бир неча бор музокараларни қайта тиклашни таклиф қилишган. Россия томони тайёр, тўп Украина тарафида”, деди 11 ноябр куни ТАСС агентлигига берган изоҳида Россия ТИВнинг МДҲ мамлакатлари бўйича иккинчи департаменти раҳбари Алексей Полишук.
Полишукнинг таъкидлашича, аввалги учрашувларда “гуманитар соҳада муҳим келишувлар” – ҳарбий асирларни кенг кўламда алмашиш, ҳалок бўлганларнинг жасадларини қайтариш ва фуқаролик шахсларини репатриация қилиш бўйича келишувларга эришилган.
Полишук Украина Россиянинг “Истанбул жараёни доирасида учта ишчи гуруҳ ташкил этиш” ҳақидаги таклифига жавоб бермаганини билдирди. Бунга жавобан Кислица Россия ташаббуси фақат расмиятчилик учун қилинганини айтди: россияликлар “WhatsApp гуруҳлари” ва шунга ўхшаш каналлар орқали мулоқот қилишни таклиф этган, аммо масалаларнинг мазмунини муҳокама қилишдан қочган. Украина дипломатига кўра, Москва шундай йўл билан АҚШга гўёки музокараларда илгарилаш бордек кўрсатиб, янги санкциялардан қутулишни истаган.
