Жиноят ишлари бўйича Чуст туман судида Россия Қуролли кучлари сафида хизмат қилган 26 ёшли фуқаро 34 миллион сўм жаримага тортилди.
Аниқланишича, 1999 йилда Чуст туманида туғилган И.Ҳ. 2024 йилнинг январь ойида Рязань вилояти ҳудудида бўлган вақтида миграция тартибини бузгани ҳамда транспорт воситасида йўл транспорт ҳодисасини содир этгани учун маҳаллий ҳуқуқни муҳофаза қилувчи органлар томонидан ушланган. Тергов жараёнида унга кейинчалик жиноий жавобгарликка тортилмаслик шарти билан Россия Федерацияси Қуролли кучлари таркибига кириш бўйича шартнома имзолаш таклиф қилинган. Таклифга асосан у 2024 йил 16 январь куни шартнома имзолаб, Россия Мудофаа вазирлигига қарашли ҳарбий қисмда оддий аскар сифатида “ўқчи” лавозимида хизмат қилишга киришган. Ҳарбий тайёргарлик давомида 190 минг рубль (28 миллион сўм) миқдорида ойлик маоши олган.
Февраль ойида Россия—Украина ўртасидаги жангларда иштирок этишдан бўйин товлагани сабабли ўзига етказилган тан жароҳатлари оқибатида бир неча ҳарбий госпиталларда даволанган ва май ойида Ўзбекистонга қайтиб келган. Орадан бир йил ўтиб, яна Москва шаҳрига ишлаш учун бориб, август ойида қайтиб келган. Аммо ҳарбий жараёнларга жалб қилингани бўйича ҳеч кимга индамаган.
Май ойида Украина давлатига қарашли “Хочу жит” номли Telegram каналида Россия—Украина ўртасидаги урушда иштирок этган 1 100 нафар ўзбекистонлик шахслар рўйхати эълон қилинганди. Мазкур рўйхатнинг 918-рақамида 1999 йилда Чуст туманида туғилган ва истиқомат қилувчи И.Ҳ. борлиги аниқланган.
Суд мажлисида И.Ҳ. айбини тан олиб, қилмишидан пушаймонлигини билдирган.
Суд ҳукмига кўра, у Жиноят кодексининг 154-моддаси 1-қисмида назарда тутилган жиноятни содир қилганликда айбли деб топилган. Унга нисбатан базавий ҳисоблаш миқдорининг 100 баробари, яъни 34 миллион сўм миқдорида жарима жазоси тайинланган. Жазо жиноят тугалланган вақтдаги базавий ҳисоблаш миқдоридан келиб чиқилган ҳолатда белгиланган.
