АҚШ Уруш департаменти, яъни Пентагон кетма-кет саккизинчи йил молиявий аудитдан ўта олмади. Бу ҳақда идора ҳисоботида маълум қилинди. Ҳолат мамлакатнинг энг йирик федерал агентлиги ўз активларининг аниқ ҳисобини юритишда ҳануз тизимли муаммоларга дуч келаётганини кўрсатади.
Пентагон АҚШ Конгресси йиллик аудитларни мажбурий қилган 2018 йилдан бери ҳар сафар салбий баҳо олиб келади. У АҚШ федерал ҳукумати таркибига кирувчи 24 та агентликнинг молиявий аудитдан ўта олмаган ягона йирик тузилмаси бўлиб турибди.
АҚШ Уруш вазирлигининг 2025 молия йили бўйича ҳисоботида 26 та жиддий камчилик ва 2 та йирик нуқсон аниқланган. Joint Strike Fighter қирувчи самолёт дастурига оид хатолар шулар жумласидан. Аудиторлар дастур доирасида глобал эҳтиёт қисмлар захираси тўлиқ кўрсатилмаганини аниқлаган. Ҳисоботда айтилишича, вазирлик ушбу активларнинг мавжудлиги ёки қийматини тасдиқлаш учун ишончли маълумотлар тақдим эта олмаган. Бунинг натижасида умумий молиявий ҳисоботларда жиддий чалкашликлар юзага келган.
АҚШ уруш вазири Пит Ҳегсет идора йиллик аудит анъанасига содиқ қолишини ҳамда бюджет бўйича кенг қамровли текширув олиб борилаётганини маълум қилди. Пентагон маълумотига кўра, идора 4,65 триллион долларлик активлар ва 4,7 триллион долларлик мажбуриятларга эга.
“Биз аудит натижаларини очиқ эълон қилишга ва улардан тузилмани мунтазам такомиллаштириб бориш учун йўл-йўриқ сифатида фойдаланишга содиқмиз”, деган у.
Пентагон бош молиявий директори Жулес Ҳурст ҳисоботга мактуб илова қилиб, унда идора 2028-йилгача асосий муаммоларни бартараф этиш режаси борлигини маълум қилган.
