Наманганда собиқ банк раҳбари ер майдонининг ҳужжатларини расмийлаштириб бериш эвазига фуқародан 20 минг доллар олаётганда ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти ахборот хизмати хабар берди.
Маълум қилинишича, департаментнинг Наманган вилояти бошқармасига Янги Наманган туманида яшовчи фуқаро мурожаат қилган.
Аризачининг билдиришича, “Саноат қурилиш банк” Наманган вилояти филиалининг собиқ бошқарувчиси унга вилоят насос станциялари ва энергетика бошқармаси балансидаги, Норин туманида жойлашган ер майдонини сотишни таклиф қилган. Мазкур ер майдони балиқчиликни ривожлантириш учун ижара асосида фойдаланишга берилиши режалаштирилган. Шунингдек, у танишлари орқали ернинг кадастр ҳужжатларини расмийлаштириб беришини айтган. Бунинг эвазига у фуқародан 29 минг доллар талаб қилиб, 20 минг долларни олдиндан беришни сўраган.
Фуқаронинг аризасига мувофиқ жорий йилнинг 30 июль куни ҳуқуқни муҳофаза қилувчи органлар томонидан тезкор тадбир ўтказилган. Унда собиқ банк раҳбари Давлатобод туманидаги кўп қаватли уйлар олдида аризачидан кимёвий ишлов берилган 20 минг долларни олаётган вақтида ушланган.
Ҳолат юзасидан Жиноят кодексининг тегишли моддалари билан жиноят иши қўзғатилган. Ҳозирда тергов ҳаракатлари олиб борилмоқда.
