Англиянинг 2016-йилдаги чемпиони “Лестер Сити” футбол клуби хўжайинлари жамоани сотишга қарор қилди. The Athletic нашрининг хабар беришича, клуб эгалари ушбу савдодан 300 миллион доллар ишлаб олишни кўзламоқда. Бироқ жамоанинг Англия футбол тизимидаги учинчи дивизионга тушиб кетгани сабабли, клубнинг бозор қиймати 200 миллион долларгача пасайиб кетиши эҳтимоли мавжуд.
Бўлажак харидор нафақат асосий жамоага, балки бутун бошли катта инфратузилмага ҳам эга чиқади. Хусусан, сотилаётган активлар қаторидан “Кинг Пауэр” стадиони, “Сиграв” машғулотлар базаси, аёллар жамоасининг “Белвуар Драйв” қароргоҳи, клубга тегишли ер участкалари, футбол академияси, аёллар жамоаси ҳамда Бельгиянинг “Ауд-Хеверле Лёвен” футбол клуби жой олган.
“Лестер Сити” Англиянинг энг қадимий футбол клубларидан бири ҳисобланади. Жамоа 1884-йилда ташкил топган бўлиб, дастлаб “Лестер Фосс” номи билан аталган, 1919-йилдан бошлаб эса ўзининг ҳозирги номига эга бўлган. Маълумки, клуб 2016-йилда Англия чемпиони деган номга сазовор бўлган. Шунингдек, “Лестер Сити” Англия Лига Кубогининг уч карра соҳиби саналади. 2021-йилнинг май ойида эса клуб Лондоннинг “Челси” жамоасини мағлуб этган ҳолда, ўз тарихида илк бор Англия Кубогида зафар қучган эди.
