Жанубий Кореяда робот махсус маросим орқали буддистлар жамоасига қабул қилинди. Бу ҳақда “Yonhap” агентлиги хабар берди.
Маросим Жоге Ордер буддист орденида бўлиб ўтди. Сеулдаги тадбир давомида инсон-роҳиб роботдан: “Муқаддас таълимотга ўзингни бағишлашга тайёрмисан?” деб сўраган. Робот эса: “Ҳа, мен унга ўзимни бағишлашга тайёрман”, деб жавоб берган.
Шундан кейин руҳоний устоз робот учун махсус мослаштирилган бешта буддист қоидасини тушунтирган. Улар орасида: ҳаётни ҳурмат қилиш ва зарар етказмаслик, бошқа роботларни бузмаслик, инсонларга қулоқ солиш ва уларга қарши чиқмаслик, сўзда ҳам, ҳаракатда ҳам алдамаслик, энергияни тежаш ва ортиқча қувват олмаслик каби қоидалар борлиги айтилган.
Сўнг роботга буддистча “Габи” номи берилган.
Агентлик маълумотига кўра, Габи оддий диндорлар учун мўлжалланган қасамёдни қабул қилган, бироқ яқин орада ибодатхонада “фахрий роҳиб” сифатида хизмат қила бошлайди.
Жоге орденининг маданият масалалари бўйича масъул роҳиби Сон Воннинг айтишича, улар талаффузи осон, бироз эски услубдаги ва Будда меҳр-шафқатини дунёга ёйишга ёрдам берадиган исм танлашни исташган. Унинг фикрича, робот учун ишлаб чиқилган ушбу беш тамойил келажакда одамлар ва машиналарнинг тинч бирга яшаши учун асос бўлиши мумкин.
Маросим давомида робот “қўлларини” олдида бирлаштириб турди, роҳибларга таъзим қилди ва улардан тасбеҳ олди. Одатда роҳибликка қабул қилинаётган инсон қўлларини ладан тутуни ёнида бироз куйдирадиган маросим ўрнига, роботга махсус стикер ёпиштирилган. Габи шунингдек роҳиб кийимини ҳам кийган эди.
Режаларга кўра, у яна учта робот билан биргаликда Будда таваллуди муносабати билан ўтказиладиган лотус чироқлари фестивалида қатнашади.
