Финляндия ҳарбий-денгиз кучлари 18–29 май кунлари Narrow Waters 26-1 машғулотларини ўтказади. Унда қарийб уч минг ҳарбий хизматчи иштирок этади.
Машғулотлар Жанубий Финляндиянинг қирғоқбўйи ҳудудлари ва Архипелаг денгизини қамраб олади. Асосий мақсад реал уруш шароитида ҳаракат қилишга тайёргарликни синовдан ўтказишдан иборат. Машғулотлар давомида денгиз ва ҳавода дронлардан фаол фойдаланиш режалаштирилган.
Финляндия ҳарбийларига Германия денгиз флотининг қирғоқ қўриқчилари ротаси (тахминан 100 киши) ҳамда АҚШ денгиз пиёдаларининг 30 га яқин ҳарбийси қўшилади. 2023 йил баҳорида Россиянинг Украинага ҳужумидан сўнг НАТОга аъзо бўлган Финляндия мунтазам равишда альянснинг Россия чегаралари яқинидаги машғулотларида иштирок этиб келмоқда.
Хусусан, март ойида мамлакат шимолида Норвегия бошчилигидаги Cold Responce 26 кенг кўламли машғулотлари ўтказилганди. Унда АҚШ ва Буюк Британия каби 14 давлатдан 25 минг ҳарбий иштирок этган.
Машғулотлар давомида НАТОнинг шимолий флангини мустаҳкамлаш ва мураккаб иқлим шароитларида ўзаро ҳамкорликни кучайтириш устида ишланган. Бундан ташқари, 2025 йил ноябрида Россия чегарасидан атиги 100 километр узоқликда Northern Strike 25 машғулотлари ҳам бўлиб ўтган. Унда 2,2 минг ҳарбий ва 500 та техника жалб қилинган.
Финляндия альянсга қўшилгач, НАТОнинг Россия билан умумий чегараси икки бараварга ошиб, 1300 километрдан ортди. Орадан кўп ўтмай, 2024 йил баҳорида Швеция ҳам альянсга қўшилди. Шунга қарамай, дастлаб Украинага бостириб киришни НАТО кенгайишига қарши чоралар билан изоҳлаган Россия президенти Владимир Путин кейинчалик Хелсинки ва Стокгольмнинг альянсга қўшилишини “жиддий таҳдид деб ҳисобламаслиги”ни билдирган.
