Туркия Президенти Ражаб Тойиб Эрдўған Анқарада бўлиб ўтган НАТОнинг 36-саммити якунида альянс етакчиларига уларнинг исми ўйиб ёзилган махсус ишлаб чиқарилган тўппонча ҳамда бир қути ўқ-дорини совға қилди. Бу ҳақда “Haber7” хабар берди.
Эрдўған Европа комиссияси раиси Урсула фон дер Ляйен, Европа кенгаши президенти Антониу Кошта ҳамда қатор Европа давлатлари раҳбарларига ҳам ушбу совғаларни топширган.
Европа кенгаши президенти Антониу Коштанинг унга совға қилинган тўппончасини хавфсизлик хизмати текшириш учун олиб қўйган. Европалик амалдорларнинг айтишича, ушбу қурол Бельгияда амал қиладиган қатъий қурол қонунчилиги талабларига мос келмайди. Шу сабабли Кошта ва Урсула фон дер Ляйен уни шахсан ўзида сақлаши кутилмаяпти.
Буюк Британия Бош вазири Кир Стармер эса мамлакатдаги қурол импортига оид қонунчилик сабабли ўзига совға қилинган тўппончани Буюк Британияга олиб кетмаган. Қурол хавфсизлик мақсадида жанговар ҳолатдан чиқарилиши учун Буюк Британиянинг Анқарадаги элчихонасида қолдирилган.
Шунингдек, Эрдўған етакчиларга совға қилинган қуролларни ўз мамлакатларига олиб чиқишлари учун зарур экспорт ҳужжатларини ҳам топширган.
