“Anorbank” АЖ реклама қонунчилигини бузгани учун молиявий жаримага тортилди ҳамда қонунбузилишни бартараф этиш бўйича мажбурий кўрсатма берилди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси хабар берди.
Қўмитаси томонидан Тошкент вилоятида истиқомат қилувчи фуқаронинг мурожаати асосида “Anorbank” томонидан Instagram ижтимоий тармоғида жойлаштирилган реклама ахбороти ўрганилди. Хусусан, мазкур мурожаатда банк томонидан акция доирасида эълон қилинган ахборотларда акция шартлари тўғрисида тўлиқ маълумотлар берилмаганлигига эътироз билдирилган.
Қайд этилишича, ўрганишларда рекламада молиявий хизматларни кўрсатишда шартноманинг муҳим шартларидан бири – акциянинг амал қилиш шартлари, унга қўлланилган лимит ҳамда лимитдан ошган ҳолларда комиссия тўғрисидаги маълумотлар мавжуд эмаслиги аниқланган.
Билдирилишича, юқоридаги ҳолатлар юзасидан Қўмита Махсус комиссияси томонидан Ўзбекистон Республикасининг “Реклама тўғрисида”ги Қонунининг 16, 21 ва 43-моддалари талаблари бузилиши аломатлари юзасидан “Anorbank”га нисбатан иш қўзғатилиб, ишни кўриб чиқиш якунлари бўйича молиявий жарима қўлланилган.
Шунингдек, қонунбузилиш ҳолатини бартараф этиш ҳамда келгусида бундай ҳолатларга йўл қўймаслик юзасидан бажарилиши мажбурий бўлган кўрсатма берилган.
