Ўзбекистонда 2026 йил февраль ойида камчиликлар аниқланган 11 банкка нисбатан жарима санкциялари қўлланилди. Бу ҳақда Марказий банк матбуот хизмати хабар берди.
Маълум қилинишича, Марказий банкнинг Банк назорати қўмитаси томонидан 2026 йилнинг февраль ойидаги йиғилишлар (жами 7 марта) давомида 43 та масала кўриб чиқилган ва улар бўйича тегишли қарорлар қабул қилинган.
Рўйхатга олиш ва рухсат бериш йўналишида жами 30 та масала, шу жумладан, кредит ташкилотлари уставига киритилган ўзгартиришларни рўйхатдан ўтказиш (3 та), кредит ташкилотларининг устав фондидаги улушига эгалик қилиш учун рухсат бериш (1 та), банкларда аудит ўтказиш ҳуқуқини бериш учун аудиторлик малака сертификатини тақдим этиш (6 та), микромолия ташкилотларини ҳисоб рўйхатидан ўтказиш (5 та), тўлов ташкилоти фаолиятини амалга ошириш учун лицензия қайта расмийлаштириш (1 та), шунингдек, тижорат банклари кузатув кенгаши ва бошқаруви аъзолари ҳамда муҳим аҳамиятга эга ходимларининг номзодларини кўриб чиқиш
(14 та) билан боғлиқ масалалар кўрилган.
Шу билан бирга, кредит ташкилотларининг молиявий ҳолатига оид 13 та масала кўриб чиқилган.
Шунингдек, қонунчилик талабларига мувофиқ фаолиятини ташкил этмагани учун хамда инспекция ва ўрганишлар давомида аниқланган камчиликлар учун 11 та банкга нисбатан жарима санкциялари қўлланилган.
Пруденциал норматив талабларига риоя этилмаганлиги, ўз фаолиятини қонунчилик ҳужжатлари талабларига белгиланган тартибда мувофиқлаштирмагани ҳамда ўрганишлар давомида аниқланган камчиликлар учун 14 та банк ва 4 та тўлов ташкилоти чора ва санкциялар қўлланилиши тўғрисида огоҳлантирилган.
Бундан ташқари, 8 та банкка нисбатан вужудга келиши мумкин бўлган йўқотишларнинг банк молиявий барқарорлигига салбий таъсирини камайтириш, уларда макропруденсуал буферлар шакллантиришини таъминлаш мақсадида банк акциядорларига оддий акциялари бўйича дивидендлар тўлаш орқали фойдани тақсимламаслик талаби белгиланган.
