Наманган шаҳрида уйида таваккалчиликка асосланган қимор ўйинини ташкиллаштирганлар қўлга олинди. Бу ҳақда Ички ишлар вазирлиги хабар берди.
Жорий йилнинг 8 февраль куни ўтказилган тезкор тадбирда Наманган шаҳар “Сардоба” маҳалла фуқаролар йиғинида яшовчи фуқаро ўз яшаш уйида моддий манфаат эвазига таваккалчиликка асосланган карталарга пул тикиш орқали қимор ўйинларини ташкил этиб келаётгани маълум бўлган.
Тадбирда 7 нафар қимор ўйнаётган шахслар томонидан ўйин учун тикилган 10 млн 540 минг сўм пул ва 50 АҚШ доллари ҳамда хонадон эгасига қиморхона ташкил этиб берганлиги учун берилган 200 минг сўм пул ва 14 қути карталар баённома асосида расмийлаштириб олинган.
Мазкур ҳолат юзасидан Жиноят кодексининг 278-моддаси (Қимор ва таваккалчиликка асосланган бошқа ўйинларни ташкил этиш ҳамда ўтказиш) 1-қисми билан жиноят иши қўзғатилиб, ҳозирда тергов ҳаракатлари бошланган.
