Сурхондарёда департамент органларида ишлаганлигини айтиб, фуқарони ҳарбий хизматга ишга жойлаштириб қўйишни ваъда қилган шахс қўлга олинди. Бу ҳақда Бош прокуратура хабар берди.
Қайд этилишича, Бош прокуратура ҳузуридаги Иқтисодий жиноятларга қарши курашиш департаменти Шахсий хавфсизлик бошқармаси томонидан Сурхондарё вилоятида ҳуқуқни муҳофаза қилувчи органлар ходимлари билан ҳамкорликда тезкор тадбир ўтказилган.
Олинган тезкор маълумотларга кўра, фуқаро Х.И. ўзини гўёки департамент органларида ишлаганлигини айтиб, ДХХ Чегара қўшинларида хизмат қилувчи мансабдор шахслар билан яқин алоқалари мавжудлигини билдирган. У ариза муаллифи М.Қ.ни шартнома асосида ҳарбий хизматга ишга жойлаштириб қўйишни ваъда қилиб, эвазига фирибгарлик йўли билан 1000 АҚШ доллари талаб қилган.
Мазкур ҳолат юзасидан жорий йил 21 март куни ўтказилган тезкор тадбирда фуқаро Х.И. ариза муаллифидан талаб қилинган 1000 АҚШ доллари миқдоридаги, яъни 12 млн 200 минг сўм пул маблағини олган вақтида ашёвий далиллар билан ушланган.
Мазкур ҳолат юзасидан фуқаро Х.И.га нисбатан Жиноят кодексининг 168-моддаси (Фирибгарлик) 3-қисми “б” банди ва 28, 211-моддаси (Пора бериш) 1-қисми билан жиноят иши қўзғатилган.
Ўрганишлар давомида қўлга олинган фуқаро Х.И. давлат идораларида, шунингдек, Бош прокуратура ҳузуридаги департамент органларида ишламагани аниқланган.
