Парижнинг “ПСЖ” клуби Европанинг энг иқтидорли футболчиларидан бири, “Реал Мадрид” яримҳимоячиси Арда Гюлерни ўз сафига қўшиб олишни мақсад қилган. Клуб бунинг учун Испания грандига катта миқдордаги маблағ таклиф қилмоқда.
Испаниянинг Fichajes нашри хабарига кўра, “ПСЖ” 21 ёшли туркиялик футболчи учун 115 миллион евролик таклиф билан чиққан. Парижликлар раҳбарияти яримҳимоячини ёзги трансфер ойнасидаги асосий мақсадларидан бири сифатида белгилаб олган. Манбага кўра, Франция клуби ушбу келишувни амалга оширишда қатъий турибди: ҳатто “Реал” дастлабки таклифни рад этган тақдирда ҳам, “ПСЖ” музокараларни давом эттириш ниятида.
Арда Гюлер 2023-йилнинг ёзида Истанбулнинг “Фенербаҳче” клубидан 20 миллион евро эвазига “Реал”га кўчиб ўтган эди. Гарчи “қироллик клуби” яримҳимоясида рақобат ўта кучли бўлса-да, туркиялик иқтидор ўзининг юқори даражасини намойиш этиб, жамоанинг асосий таркибдаги муҳим футболчисига айланди.
Эътиборли жиҳати, агар Гюлер юқорида айтилган сумма эвазига сотилса, шартномадаги қайта сотиш бандига мувофиқ, “Фенербаҳче” бу трансфердан тахминан 23 миллион евро ишлаб олади.
Маълумот учун, 2025/2026-йилги мавсум давомида Гюлер мадридликлар сафида барча турнирлар доирасида 51 та ўйинда майдонга тушиб, 6 та гол ва 14 та голли узатмани ўз ҳисобига ёздириб қўйган. Transfermarkt портали футболчининг бозор қийматини 90 миллион еврога баҳоламоқда. Унинг “Реал” билан амалдаги шартномаси 2029-йилнинг ёзига қадар мўлжалланган.
