Россия Татаристондаги “Алабуга” заводида дронларни йиғиш учун Шимолий Кореядан 12 минг нафаргача ишчи жалб қилмоқчи. Бу ҳақда Украина Мудофаа вазирлиги Бош разведка бошқармаси хабар берди.
Маълумотларга кўра, шимолий кореялик ишчилар Украинадаги фуқаролик инфратузилмасига ҳужум қилиш учун мўлжалланган “Shahed” типидаги дронларни ишлаб чиқаришда қатнашади. Ишчи кучини етказиб бериш тафсилотлари октябрь ойи охирида Россия Ташқи ишлар вазирлигида муҳокама қилинган.
Жумладан, россиялик амалдорлар кореялик ишчиларни қидириш ва ёллаш билан шуғулланувчи Шимолий Кореянинг Jihyang Technology Trade Company компанияси вакиллари билан музокара олиб борган. КХДРдан келган ишчиларга кунига 12 соатлик меҳнат учун соатига қарийб 2,5 доллар миқдорида маош ваъда қилинмоқда.
“Бундай чора-тадбирлар Украинага қарши урушни давом эттириш учун икки диктатура ўртасидаги стратегик ҳамкорлик чуқурлашаётганидан далолат беради”, дея таъкидлади Бош разведка бошқармаси.
Аввалроқ Украина разведкаси раҳбарининг ўринбосари Вадим Скибицкий Шимолий Кореядан Россияга артиллерия снарядлари етказиб бериш қисқарганини айтганди. 2023—2024 йиллардаги йирик етказиб беришлардан сўнг, КХДР захираларининг камайиши сабаб 2025 йилда ҳажм икки баравардан кўпроқ қисқарган.
Шу билан бирга, КХДР ўзининг FPV-дронлари ва ўрта масофали дронларини ишлаб чиқаришни фаоллаштирмоқда. Скибицкийга кўра, Россия 2025 йилда 120 мингтагача арзон авиабомба ишлаб чиқариши, қарийб 500 та янги узоқ масофали модификациялар яратиши мумкин.
