Тиббиёт соҳасида хусусий сектор имкониятларини кенгайтиришга қаратилган янги президент фармони қабул қилинди. Ҳужжатга кўра, миллий ёки халқаро аккредитациядан ўтган нодавлат тиббиёт ташкилотларига 2027 йил 1 майдан инсон аъзолари ва тўқималарини трансплантация қилиш амалиёти билан шуғулланишга рухсат берилади.
Фармонда қайд этилишича, хусусий тиббиёт муассасалари трансплантация фаолиятини амалга оширишда қонунчиликда белгиланган тартибларга қатъий риоя қилиши шарт.
Шунингдек, нодавлат тиббиёт ташкилотларининг трансплантация билан боғлиқ фаолияти «хавфни таҳлил қилиш» тизими орқали хавфи юқори йўналиш сифатида баҳоланади.
Янги тартибга мувофиқ, трансплантация амалиёти ўтказилган беморлар ва донорлар ҳақидаги маълумотлар Соғлиқни сақлаш вазирлигига мунтазам тақдим этиб борилади.
Фармонда тиббиёт инфратузилмасини ривожлантиришга доир қўшимча механизмлар ҳам белгиланган. Хусусан, 2027 йил 1 январдан Самарқанд вилоятида тажриба-синов тариқасида бирламчи тиббий-санитария муассасаларини қуриш ва реконструкция қилишнинг янги модели жорий этилади.
Унга кўра, тадбиркорлар объектларда қурилиш-монтаж ишларини ўз маблағлари ҳисобидан амалга оширади. Ишлар якунлангач, белгиланган тартибда қабул қилинган объектлар учун маблағлар тадбиркорларга қайтариб берилади.
