Куба Олий суди собиқ иқтисодиёт вазири Алежандро Гилни жосусликда айбдор деб топиб, умрбод қамоқ жазосига ҳукм қилди. Бу ҳақда Al Jazeera хабар берди.
Гилга коррупция билан боғлиқ айбловлар бўйича қўшимча равишда 20 йил қамоқ жазоси ҳам тайинланган. Ушбу айбловлар орасида порахўрлик, ҳужжатларни сохталаштириш ва солиқ тўлашдан бўйин товлаш бор.
Гил 2018–2024-йилларда иқтисодиёт вазири лавозимида ишлаган ва президент Мигел Диас-Канелнинг яқин одами бўлган. 61 ёшли сиёсатчи 2024 йил февралида лавозимидан бўшатилган ва суд жараёнларигача оммага кўриниш бермаган.
Суд собиқ вазирнинг аниқ қандай ҳаракатлари ёки кимнинг фойдасига жосуслик қилганига оид батафсил маълумот бермади. Бироқ Гил “коррупцион ва ёлғон ҳаракатлар” содир этгани, шунингдек, лавозим ваколатларидан “шахсий манфаатлар учун фойдалангани” маълум қилинди. Бундан ташқари, у хорижий компаниялардан пул олгани ҳамда мулк сотиб олишни қонунийлаштириш учун бошқа давлат амалдорларига пора бергани айтилди.
“У ихтиёридаги махфий маълумотлар билан ишлаш қоидаларига риоя қилмаган, уларни ўғирлаган, зарар етказган ва охир-оқибат душман ихтиёрига топширган”, дейилади хабарда.
Гил ҳукм устидан 10 кун ичида шикоят қилиш ҳуқуқига эга. Собиқ вазирга оид иш 2009-йилда вице-президент Карлос Лаже ва ташқи ишлар вазири Фелипе Перес Роке ишдан бўшатилганидан буён юқори лавозимли амалдорлар орасидаги энг йирик ҳолат ҳисобланади. Лаже ва Рокенинг иши махфий маълумотларнинг сизиб чиқиши билан боғлиқ бўлган, бироқ улар бу бўйича ҳукм қилинмаган.
Гил жамоатчилик юзи бўлган, жумладан, мамлакат валюта тизимини бирлаштиришга ҳаракат қилган. Аммо аллақачон иқтисодий инқироз ва баъзи маҳсулотлар танқислигидан азият чекаётган Кубада инфляцияни оширган.
