Паркент–Тошкент–Паркент йўналишида 7 сентябрдан шаҳарлараро электропоезди қатнови бошланди. Бу ҳақда “Ўзбекистон темир йўллари” АЖ матбуот хизмати хабар берди.
Поездда 586 ўриндиқ бўлиб, жами 1154 тагача йўловчи сиғими мавжуд. Чипталар нархи катталар учун 10 минг сўмгача, 10 ёшгача бўлган болаларга 6 ярим минг сўм этиб белгиланди. Манзилгача бўлган масофа 50 дақиқани ташкил қилади.
Президентнинг 2025 йил 27 январдаги қарори асосида “Ўзбекистон темир йўллари” акциядорлик жамияти мутахассислари томонидан Тошкент вилоятидаги Байтқўрғон–Паркент темир йўл линиясининг қурилиши 2025 йил январь ойида бошланган эди. Лойиҳа доирасида дастлаб, узунлиги 24 километрдан иборат бўлган электрлаштирилган темир йўл, 3 дона темир-бетон кўприк, 1 дона автомобил йўл ўтказгич, 76 дона сув ўтказиш иншооти ҳамда 16 дона автомобил йўли ва темир йўли кесишмалари, бундан ташқари, 50 ўринли “Паркент” темир йўл бекати қурилди.
Хабарда таъкидланишича, мазкур йирик лойиҳа фойдаланишга топширилиши келгусида Тошкент вилоятининг Паркент тумани ҳам сайёҳлик манзилига айланади. Бу нафақат маҳаллий аҳоли учун янги иш ўринларини яратади, балки мамлакат туризм секторига ҳам катта фойда келтиради.
