АҚШ Президенти Дональд Трамп Medicare дастури бўйича суғурта бадаллари харажатларини қоплаш учун 20 миллиондан ортиқ кекса америкаликларга бир марталик тўловлар берилишини эълон қилди. Бу ҳақда у Truth Social ижтимоий тармоғидаги саҳифасида маълум қилди.
Қайд этилишича, тўловларнинг умумий суммаси қарийб 2 миллиард долларни ташкил этади. Оқ уй раҳбари, шунингдек, 3 ноябрга мўлжалланган Вакиллар палатаси ва Сенатга оралиқ сайловларда Республикачилар партияси ғалаба қозонган тақдирда, АҚШнинг барча катта ёшли фуқароларига 5 минг доллардан тарқатишга яна бир бор ваъда берди. Сентябрь ойида у бюджетга 1 триллион доллардан ортиққа тушадиган шунга ўхшаш режалар ҳақида ҳам баёнот берган эди.
Трамп ҳукумат Medicare Part B суғурта дастурида рўйхатдан ўтган 20 миллиондан ортиқ кекса АҚШ фуқароларига 90 доллардан бир марталик тўловларни юборишни бошлаётганини айтган. Оқ уй раҳбарининг сўзларига кўра, “унинг маъмурияти 20 миллиондан ортиқ ажойиб кекса америкаликларга суғурта бадалларини тўлашга ёрдам бериш учун зудлик билан қарийб 100 долларлик чекларни юборишни бошлайди”. Ушбу мақсадлар учун тахминан 2 миллиард доллар сарфланади.
АҚШ Президенти ушбу тўловлар илгари эълон қилинган, унинг ўтмишдоши Жо Байден даврида тиббий суғурта учун ортиқча тўлов қилган деб ҳисобланган тахминан 1 миллион америкаликка маблағларни қайтариш дастури билан боғлиқ эмаслигини таъкидлаган. 10 сентябрда ушбу режаларни эълон қилар экан, Трамп унинг “маъмурияти тўғри иш тутаётганини ва ноҳақ шилинган одамларга пулларни қайтараётганини” айтган. Гап бюджетга умумий ҳисобда тахминан 500 миллион долларга тушадиган 500 долларлик бир марталик тўловлар ҳақида бормоқда.
