АҚШ президенти Дональд Трамп камида 1 миллион доллар тўлай оладиган бадавлат чет элликлар учун тезлаштирилган виза дастурини ишга туширди. Бу ҳақда BBC хабар берди.
Трампнинг айтишича, “олтин карта” махсус иммиграция визаси ҳисобланади. У талабга жавоб берадиган ва текширувдан ўтган шахслар учун “тўғридан тўғри фуқароликка йўл очади”.
“Жуда ажойиб! Бизнинг буюк Америка компанияларимиз ниҳоят ўзининг бебаҳо истеъдодларини сақлаб қола олади”, деди президент.
2025-йилнинг бошида эълон қилинган Тrump Gold Cаrd — мамлакатга “сезиларли фойда” келтиришини исботлай оладиган шахсларга бериладиган АҚШ визасидир. Бу ташаббус АҚШнинг иммиграция сиёсатини кескин кучайтираётган, ишчи визалар учун тўловларни оширган ва ҳужжациз муҳожирларни депортация қилаётган бир пайтга тўғри келмоқда.
- Олтин карта дастури АҚШда “рекорд тезликда” яшаш ҳуқуқини ваъда қилади. 1 миллион долларлик тўлов эса “давлатга сезиларли фойда келтириш”нинг исботи сифатида талаб этилади.
Ходимларни ҳомийлик асосида олиб келмоқчи бўлган компаниялар 2 миллион доллар, шунингдек, қўшимча тўловларни тўлаши керак бўлади. Тез орада 5 миллион доллар эвазига махсус солиқ имтиёзларини тақдим этувчи картанинг “платина” версияси ҳам сотувга чиқарилади. Аризачининг ҳолатига қараб ҳукумат қўшимча тўловлар ундиришни ҳам кўзда тутган. Шунингдек, ариза кўриб чиқилишидан олдин 15 минг долларлик қайтарилмайдиган хизмат ҳақи тўланиши керак.
Дастур илк бор февралда маълум қилингандан бери танқидга учраб келмоқда. Баъзи демократлар бу тизим бойлар фойдасига адолатсиз ишлашини таъкидлади. Трамп дастур тақдимотида бу визаларни даромад даражасидан қатъи назар, кўплаб муҳожирларга АҚШда доимий яшаш ва ишлаш ҳуқуқини берадиган “грин карта”ларга ўхшатган эди. Green cаrd эгаларига одатда беш йилдан сўнг фуқароликка мурожаат қилиш ҳуқуқи берилади.
Бироқ Трамп ўшанда Gold Cаrd “юқори малакали” мутахассислар учун мўлжалланганини айтиб, улар иш ўринларини яратишини таъкидлаган. Дастур Трамп маъмуриятининг муҳожирларни депортация қилишга катта ресурс йўналтираётган пайтда жорий қилинмоқда.
