“Манчестер Сити” 9 ноябрь, якшанба куни Англия Премьер Лигасининг 11-туридан ўрин олган баҳсда “Ливерпуль”ни қабул қилиб, 3:0 ҳисобида ғалаба қозонди. Бу учрашув “шаҳарликлар” устози Пеп Гвардиола учун мураббийлик фаолиятидаги 1000-ўйин бўлди. 54 ёшли испаниялик мутахассис шундан 550 тасини “Манчестер Сити”, 161 тасини “Бавария”, 247 тасини “Барселона” ва 42 тасини “Барселона Б” жамоалари билан ўтказган.
Шуни ҳам қўшимча қилиш керакки, Гвардиола ҳозирги кунга қадар ўтказган 1000 учрашувнинг 716 тасида ғалаба қозонган, 156 та ўйинда дуранг қайд этилган бўлса, яна 128 та беллашувда имкониятни бой берган.
Испаниялик мутахассис фаолияти давомида “Барселона” билан уч марта Испания чемпиони, икки марта мамлакат кубоги ва уч бор Суперкубок соҳибига айланган. Шунингдек, каталонияликлар билан икки марта Чемпионлар Лигасида, УЕФА Суперкубогида ва Клублар ўртасидаги Жаҳон чемпионатида ғолиб чиққан.
Гвардиола “Бавария” билан уч марта Германия чемпионлигини, икки бор мамлакат кубогини, шунингдек УЕФА Суперкубоги ва Клублар ўртасидаги Жаҳон чемпионатида зафар қучган.
“Манчестер Сити” билан эса олти марта Англия чемпионига айланган, икки марта Англия кубогини, тўрт бор лига кубогини ва уч марта мамлакат Суперкубогини қўлга киритган. Бундан ташқари, “шаҳарликлар” билан Чемпионлар Лигаси, УЕФА Суперкубоги ҳамда Клублар ўртасидаги Жаҳон чемпионатида ҳам ғалаба қозонган.
