Германия чемпионатининг 15-тури доирасида “Бавария” ўз майдонида “Хайденхайм” устидан 4:0 ҳисобида ғалаба қозонганидан сўнг, Мюнхен клуби Бундеслига турнир жадвалида пешқадамликни сақлаб қолди. Шу тариқа Венсан Компани шогирдлари Германия чемпионати тарихида бутун календарь йили давомида жадвалда биринчи ўринни эгаллаб келган илк жамоага айланди.
Маълумотларга кўра, “Бавария” 2025 йил давомида ўтказилган 34 турнинг ҳар биридан сўнг турнир жадвалининг энг юқори поғонасида бўлган. 2024/2025-йилги мавсум якунларига кўра, мюнхенликлар Бундеслига чемпиони бўлди.
Айни пайтда жамоа ҳисобида 15-турдан сўнг 41 очко мавжуд. Энг яқин таъқибчи — Боруссия эса 32 очко жамғарган. “Бавария” 16-тур доирасида 11 январь куни ўз майдонида “Вольфсбург” жамоасини қабул қилади.
Аввалроқ, Transfermarkt портали 30 ёшдан ошган дунёнинг энг қиммат 10 нафар футболчиси рейтингини эълон қилган эди. Ушбу рўйхатда “Бавария” ҳамда Англия терма жамоаси ҳужумчиси Ҳарри Кейн етакчилик қилмоқда. 32 ёшли англиялик форварднинг трансфер баҳоси 65 миллион евро этиб белгиланган. Иккинчи ўриндан унинг жамоадоши — 30 ёшли германиялик ярим ҳимоячи Жошуа Киммих (40 млн евро) жой олган.
Маълумот учун, Ҳарри Кейн жорий мавсум Бундеслигада 19 гол ва 3 та голли узатмага муаллифлик қилган ҳолда, “Олтин буца” соврини учун асосий даъвогарлардан бири бўлиб турибди.
