Кеча, 22 декабрь куни Нью-Йорк штати бош прокурори Летиция Жеймс Mercedes-Benz компанияси автомобилларга ҳаво ифлослантириш даражасини паст кўрсатадиган сохта дастур ўрнатгани юзасидан тергов якунланганлигини маълум қилди. Бу ҳақда “The Nyu-York Times” хабар берди.
Қайд этилишича, Германия автомобиль ишлаб чиқарувчиси дизель ёқилғиси чиқиндиларини сохталаштириш билан боғлиқ узоқ давом этган терговни якунлаш мақсадида АҚШ штатлари билан 149,6 миллион долларлик келишувга эришган. Ушбу келишув АҚШдаги дизель двигателлар билан боғлиқ ҳуқуқий можароларга нуқта қўйиши кутилмоқда. Можаро илк бор 2015 йил сентябрида Volkswagen атрофида юзага келган ва “Dieselgate” номи билан танилган эди.
АҚШнинг 48 штати, шунингдек Пуэрто-Рико ва Колумбия округи билан тузилган битимга кўра, Mercedes-Benz чиқинди тизимлари мажбурий таъмирдан ўтказилган дизель автомобиллари эгалари ва ижарачиларига жами 149,6 миллион доллар тўлайди. Шунингдек, ҳар бир зарарланган автомобиль учун 2000 долларгача компенсация ажратилади.
Компания дизель автомобилларига махфий ноқонуний дастурий таъминот ўрнатган. Ушбу дастур давлат синовлари вақтида чиқиндилар миқдорини сунъий равишда камайтириб кўрсатган, бироқ автомобилни ҳайдаш вақтида автомобиллар рухсат этилган меъёрдан 30-40 баравар юқори ифлослантирувчи газларни чиқарган.
Виржиния штати бош прокурори Жейсон Мияреснинг айтишича, келишув 2023 йил августига қадар таъмирланмаган ёки фойдаланишдан чиқарилмаган 39 565 та автомобилга тааллуқлидир. Компания ҳар бир бундай транспорт воситаси учун тасдиқланган эмиссия модификацияси дастурини ўрнатиш харажатларини қоплайди, кенгайтирилган кафолат тақдим этади ҳамда истеъмолчиларга қўшимча тўлов амалга оширади.
Mercedes-Benz вакили мазкур келишув компаниянинг асосий молиявий кўрсаткичларига таъсир кўрсатмаслигини, барча харажатлар учун етарли захира ажратилганини билдирди. Шунингдек, келишувлар суд томонидан якуний тасдиқланиши лозимлиги қайд этилди.
Маълумот ўрнида, 2020 йилда Mercedes-Бенз АҚШ ҳукумати ва қарийб 250 минг нафар автомобиль эгаси билан дизель чиқиндилари бўйича даъволарни ҳал қилиш учун 2,2 миллиард доллар тўлашга рози бўлган эди.
Мазкур тергов 2020 йилда бошланган бўлиб, у аввалроқ Volkswagen’га қарши очилган ва компания 20 миллиард доллардан ортиқ жарима ва келишувларга тортилган машҳур “Dieselgate” можаросининг давомий оқибатларидан бири ҳисобланади. Ҳозирда дунёнинг бир қатор йирик автомобиль ишлаб чиқарувчилари ушбу можаро доирасида суд жараёнларига дуч келмоқда.
