Тошкентнинг Яккасарой туманидаги дарахткушлик билан боғлиқ ҳолат ортидан ободонлаштириш ходимларига жиноят иши очилди. Бу ҳақда экология вазири маслаҳатчиси Расул Кушербаев хабар берди.
25 октябрда Яккасарой тумани Нукус ва Бобур кўчалари кесишмасидан бошлаб автомобиль йўли ёқасида жойлашган жами 174 туп дарахт ва бута кесилиб, табиатга 1 млрд 460 млн 952 минг сўм зарар етказилганди.
8 ноябрь куни ободонлаштириш бошқармаси мансабдорлари ва бошқаларга нисбатан Жиноят кодекснинг 198-моддаси 2-қисмига (ўрмонларни, дарахтларни ёки бошқа ўсимликларни қонунга хилоф равишда кесиш кўп миқдорда зарар етказилишига сабаб бўлиши) асосан жиноят иши қўзғатилган.
Ушбу модда билан айбдор деб топилганлар БҲМнинг 100 бараваридан 150 бараваригача (41,2 млн сўмдан 61,8 млн сўмгача) миқдорда жарима ёки 240 соатдан 300 соатгача мажбурий жамоат ишлари ёхуд бир йилдан икки йилгача ахлоқ тузатиш ишлари ёки бир йилдан уч йилгача озодликни чеклаш ёхуд уч йилгача озодликдан маҳрум қилиш билан жазоланади.
“Қизиғи, дарахт кесиш топшириғини берган шаҳар ҳокими ўринбосари Бахтиёр Раҳмонов яна сувдан қуруқ чиқмоқда. Унинг ўрнига топшириқни бажарган, ‘танкаъси йўқ ободонлаштириш ходимлари жавоб берадиган кўринади. Мана бу ҳақиқий номардлик”, деди Расул Кушербаев.
Айни вақтга тергов ҳаракатлари олиб борилмоқда.
