Кеча, 15 февраль куни Қирғизистон Миллий хавфсизлик давлат қўмитасининг (МХДҚ) Бишкек шаҳри бўйича бошқармаси собиқ раҳбари Элдр Жақипбеков ҳибсга олинди. У жорий йилнинг 15 апрелигача ҳибсда сақланади. Бундай қарорни Бишкек шаҳрининг Биричи май туман суди қабул қилган. Бу ҳақда “24.kg” хабар берди.
Нашрнинг ёзишича, Қирғизистон Ҳарбий прокуратураси унга “коррупция” моддаси бўйича айблов қўймоқда.
Куч тузилмаларидаги манбаларга кўра, у сўнгги сутка ичида қўлга олинган ва вақтинчалик сақлаш изоляторига жойлаштирилган. Ишнинг тафсилотлари ва унинг расмий мақоми ҳақида ҳозирча батафсил маълумот берилмаган. Ижтимоий тармоқларда собиқ раҳбар қўлга олинганидан кейин туширилгани тахмин қилинаётган сурат ҳам тарқалган.
Қайд этиш жоиз, жорий йилнинг 14 февраль куни МХДҚнинг пойтахт бошқармаси раҳбарияти алмаштирилгани маълум бўлди. Янги раҳбар этиб Улан Бибосунов тайинланган. Жақипбековнинг қўлга олингани ҳақида илк хабарлар 10 февралда пайдо бўлган. Ўшанда МХДҚбу маълумотни расман рад этган.
