БМТнинг Қочқинлар бўйича олий комиссарлиги (UNHCR) ва Халқаро миграция ташкилоти ҳамкорликда афғонистонлик муҳожирлар ҳақида ҳисобот эълон қилди. Унга кўра, сўнгги беш ойдан кам вақт ичида Покистонда 130 мингдан ортиқ афғонистонлик муҳожир ҳибсга олингани аниқланди. Бу ҳақда Tolo News хабар берди.
Ҳисоботда қайд этилишича, афғон муҳожирлари 2025 йил сентябрь ойидан 2026-йилнинг январь ойигача бўлган даврда ушланган. Покистон ОАВнинг БМТ маълумотларига таяниб ёзишича, афғонистонликларни ҳибсга олиш кўрсаткичи 18 фоизга ошган.
UNHCR ва миграция ташкилоти томонидан эълон қилинган рақамлар 2025 йил 15 сентябрдан 2026 йил 10 январгача бўлган вақт ичида жами 130 999 нафар Афғонистон фуқароси қўлга олинганини кўрсатмоқда. Ҳибсга олишларнинг ҳудудлар бўйича тақсимоти қуйидагича:
- Балужистон — 68 фоиз;
- Исломобод — 19 фоиз;
- Хайбер-Пахтунхва — 6 фоиз;
- Панжоб — 4 фоиз;
- Синд провинцияси — 3 фоиз.
Покистонлик ҳуқуқшунос Сиддиқ Какарнинг тушунтиришича, мамлакатда қонуний яшашнинг ягона йўли паспорт ва визага эга бўлишдир. Виза ва паспорти бўлмаган ҳар қандай шахс суд мажлисидан сўнг Афғонистонга депортация қилинади.
Муҳожирлар Покистон полициясининг ҳаракатларидан шикоят қилмоқда. Уларнинг сўзларига кўра, полиция нафақат эркакларни, балки аёллар, болалар ва журналистларни ҳам ҳибсга олмоқда. Аввалроқ Амнестй International халқаро инсон ҳуқуқлари ташкилоти Покистон бош вазирига мактуб йўллаб, афғонистонликларни мажбурий депортация қилишни тўхтатишга чақирган эди.
Лагерларда электр энергияси ва сув узиб қўйилди
Tolo News’га кўра, Хайбер-Пахтунхва провинциясидаги лагерда яшаётган афғон муҳожирлари ўз буюмларини йиғиштириб, ватанига қайтишга мажбур бўлмоқда. Сабаби лагерлардан электр токи ва ичимлик суви узиб қўйилган. Муҳожирлар нафақат депортациядан, балки фарзандлари учун мактабларнинг ёпиқлигидан ҳам хавотирда. Покистондаги қочқинлар ҳуқуқлари бўйича фаол Аллоҳ Мир Мияхил вазиятни кескин танқид қилди:
“Покистондаги афғон муҳожирларига бошқа жойлардаги жиноятчилардан ҳам ёмонроқ муносабатда бўлинмоқда. Афғон болалари учун мактаблар ва диний муассасалар ёпиб қўйилди. Электр энергияси узилди, ҳатто тоза сув ичиш имкониятидан ҳам маҳрум қилинди”, деди у.
