Жанубий Африка Республикасида мактаб ўқувчиларини олиб кетаётган микроавтобус юк машинаси билан тўқнашиб кетиши оқибатида 13 нафар бола ҳалок бўлди. Бу ҳақда BBC хабар берди.
Маълум қилинишича, ҳодиса 19 январь куни Йоҳаннесбург шаҳрининг Вандербижлпарк ҳудудида содир бўлган. Воқеа жойида 11 нафар ўқувчи ҳалок бўлган, яна икки нафар бола кейинроқ шифохонада олган жароҳатлари оқибатида жон берган. Ҳозирда икки нафар ўқувчи оғир аҳволда, уларнинг ҳолати ўта оғир дея баҳоланмоқда.
Полиция вакили Мавела Масондога кўра, микроавтобус ҳайдовчиси иккита транспорт воситасини қувиб ўтишга уринган пайтда бошқарувни йўқотиб, юк машинасига урилган. Ҳолат юзасидан бепарволик оқибатида одам ўлимига сабаб бўлиш бўйича жиноят иши қўзғатилади.
Микроавтобус ҳайдовчиси ҳозирда шифохонада даволанмоқда. Юк машинаси ҳайдовчисининг аҳволи ҳақида эса ҳозирча аниқ маълумот йўқ. Жанубий Африка Республикасида тезликни ошириш, эҳтиётсиз ҳайдаш ва техник жиҳатдан яроқсиз транспорт воситалари сабабли ўлим билан якунланадиган ЙТҲлар тез-тез учраб туради.
2025-йилда мамлакатда 11 418 киши йўл-транспорт ҳодисалари оқибатида ҳалок бўлган. Бу аввалги йилга нисбатан қарийб 6 фоизга кам бўлса-да, кунига ўртача 31 нафар ўлимга тенгдир. Жанубий Африка президенти Сирил Рамафоса ҳалок бўлганларнинг оилаларига ҳамдардлик билдирди.
“Фарзандлар — миллатнинг энг бебаҳо бойлиги. Уларни ҳимоя қилиш учун йўл ҳаракати қоидаларига амал қилишдан тортиб, ўқувчиларни ташиш билан шуғулланувчи хизмат кўрсатувчиларнинг сифатигача барча чораларни кўришимиз керак”, деди президент.
