Турин Меҳнат суди “Ювентус” клубининг собиқ ҳужумчиси Криштиану Роналдуга 9,8 миллион евро товон пули тўлаш ҳақидаги қарор юзасидан берган апелляциясини рад этди. Бу ҳақда “La Gazzetta dello Sport” нашри хабар берди.
Маълум қилинишича, 2024 йил апрель ойида арбитраж ҳайъати кўпчилик овоз билан португалиялик футболчининг клубга нисбатан молиявий даъволарини қисман қаноатлантирган ва “Ювентус”ни Роналдуга тахминан 9,8 миллион евро ҳамда фоизларни тўлашга мажбур қилган эди. Эндиликда судья Жан Лука Робалдо Италия клуби томонидан киритилган апелляцияни рад этиб, арбитраж ҳайъатининг қарорини ўз кучида қолдирди.
Роналду коронавирус пандемияси даврида клубга молиявий юкни енгиллаштириш мақсадида “Ювентус”да маошининг бир қисмини вақтинча камайтиришга рози бўлган. Бироқ, у кейинчалик ушбу маблағлар тўлиқ қопланмаганини даъво қилган. Дастлаб футболчи 19,6 миллион евро миқдорида иш ҳақи тўлаб берилишини талаб қилган.
Маълумот учун, Криштиану Роналду 2018-2021 йиллар давомида “Ювентус” сафида тўп сурган. Ушбу даврда у клуб билан биргаликда икки марта Италия чемпионлигини ва Италия кубогини қўлга киритган. Ҳозирда португалиялик футболчи Саудия Арабистонининг “Ал-Наср” жамоаси шарафини ҳимоя қилмоқда.
