Кеча, 21 ноябрь куни Нью-Йоркнинг янги сайланган мэри Зоҳран Мамдани Оқ уйнинг Овал кабинетида Президент Дональд Трамп билан учрашди. Учрашув видеоси Оқ уй томонидан эълон қилинди.
Маълум қилинишича, Трамп учрашувда жуда хушмуомала бўлган.
“Биз унга ёрдам берамиз. Бу бола билан ўйлаганимдан ҳам кўпроқ масалада келишамиз”, деган Оқ уй раҳбари.
Трампнинг қўшимча қилишича, Мамдани билан унда битта умумий жиҳат бор – иккови ҳам яхши кўрадиган шаҳрининг улкан муваффақиятга эришишини истайди.
Ўз навбатида, янги мэр ҳам Оқ уй етакчисига раҳмат айтган.
“Президентга катта раҳмат айтаман. Учрашув вақтида биз кўп келишмовчиликларимизни эмас, балки умумий мақсадимизни – Нью-Йорк аҳолиси учун хизмат қилишни муҳокама қилдик”, деган Нью-Йорк етакчиси.
Шунга қарамай, Оқ уй учрашуви ҳайратланарли даражада илиқ ўтган.
Учрашувдан кейин Трамп журналистларга уни мақтай кетган.
“У ажойиб мэр бўлади деб ўйлайман. Қанчалик яхши ишласа, мен шунчалик мамнун бўламан”, деган Оқ уй раҳбари.
Журналистлар Трампга: “Унда нега уни коммунист деб атагансиз?”, дея савол берган.
“У ўзгаради. Менинг қарашларим ҳам ўзгарган”, дея жавоб берган у ва Мамданининг вазифани жуда яхши уддалай олишига “тўлиқ ишонишини” айтган.
Учрашув давомида Трамп бир неча бор Мамданининг қўлини дўстона ушлаб, уни елкасидан қоқиб турган.
Журналистлар Мамданига ҳам: “Трампни фашист деб ҳисоблайсизми?”, дея савол берган.
Трамп бунга кулиб, Мамданининг қўлини яна бир ушлаган ҳамда: “Ҳа деб қўй, бу тушунтиришдан осонроқ”, деган. Шунда Мамдани ҳеч иккиланмасдан “ҳа” жавобини берган.
Икки сиёсатчи очиқ можаро чиқармаслик учун бор кучини сарфлагани кўринган, аммо улар кўплаб масалаларда бутунлай қарама-қарши позицияда эканини яширмаган.
Қолаверса, Мамдани учрашувда АҚШ Иммиграция хизмати Нью-Йоркда ноқонуний муҳожирларга қарши рейдлар ўтказаётгани ҳақида гапиргани, бунга кўплаб аҳолининг норози экани ҳақида айтган.
Мамдани Демократик партия номзоди сифатида ноябрь бошидаги сайловларда йирик ғалаба қозонган. Сайлов олдидан Трамп унинг сайланишига йўл қўймаслик кераклигини айтган ва ҳатто ўз партиядоши эмас, балки Демократ партиядан бўлган Эндрю Куомога овоз беришга чақирган. Куомо эса Мамданига ютқазган эди.
Мамдани ўзини демократик социалист деб атайди ва «чап қарашли» сиёсатчи ҳисобланади: у давлатга қарашли озиқ-овқат дўконларини яратиш тарафдори, муҳожирлар ҳуқуқларини ҳимоя қилади ҳамда Исроилни кескин танқид қилади.
Трамп эса сайлов кампанияси пайтида Мамданини “коммунист” деб атаган ва у ғалаба қилса, Нью-Йоркка федерал маблағларни чеклаш билан таҳдид қилганди. Мамдани эса Трампни “диктатор” ва “фашист” деб таърифлаган.
