Қўшма Штатлар президентининг махсус вакили Стив Уиткофф ва маслаҳатчиси Жаред Кушнер Исроилга бориб, бош вазир Бенямин Нетаньяху билан учрашув ўтказиши мумкин. Бу ҳақда Bloomberg хабар берди.
Агентлик хабарига кўра, музокаралар урушдан кейинги Ғазони бошқариш учун тузилган “Тинчлик кенгаши” ўз фаолиятини бошлаётган, шунингдек, Эрон атрофидаги кескинлик кучайиб бораётган бир пайтга тўғри келади. Исроил матбуот котиби Шош Бедросиан учрашув режалаштирилганини тасдиқлади, бироқ унинг вақти ҳақида маълумот бермади. Қўшма Штатларнинг Қуддусдаги элчихонаси эса вазиятга изоҳ беришдан бош тортди.
Шу билан бир вақтда, Reuters агентлиги томонлар ўртасидаги учрашув аллақачон бўлиб ўтгани ҳақида хабар берди. Маълум қилинишича, кун тартибидаги асосий масала Ғазо тақдири бўлган. АҚШ мулозимлари Бенямин Нетаньяху билан Дональд Трамп воситачилигида эришилган ўт очишни тўхтатиш бўйича келишувнинг кейинги босқичларини муҳокама қилган.
Янги Ғазо
Жорий йилнинг 22 январь куни АҚШ “Янги Ғазо” лойиҳасини эълон қилди. Режага кўра, анклав инфратузилмаси бутунлай қайта қурилади. Турар жой бинолари, савдо ва хизмат кўрсатиш объектлари, бизнес марказлари ва денгиз бўйидаги дам олиш масканлари барпо этилади. Вашингтон мазкур ташаббусни урушдан кейинги барқарорлаштириш стратегиясининг бир қисми сифатида тақдим этмоқда.
Трампнинг “Тинчлик кенгаши”
“Янги Ғазо” лойиҳаси эълон қилинган кунда АҚШ президентининг яна бир муҳим ташаббуси ҳаётга кўчди. Дональд Трамп Давосда бўлиб ўтган Жаҳон иқтисодий форумида сўзга чиқиб, “Тинчлик кенгаши” тузилганини эълон қилди. Ушбу тузилма таркибига кирган жами 19 та давлат ичида Ўзбекистон ҳам бор.
Маълум қилинишича, “Тинчлик кенгаши” ўз фаолиятини аввало Ғазо масаласидан бошлаши, сўнгра эътиборини Россия—Украина уруши ва бошқа глобал инқирозларга қаратиши режалаштирилган. Бироқ Оқ уйнинг мазкур ташаббуси на Канада, на Қўшма Штатларнинг Ғарбий Европадаги иттифоқчилари томонидан ижобий қабул қилинди.
