Ўзбекистон миллий терма жамоаси ҳамда Туркиянинг “Башакшеҳир” клуби ҳужумчиси Элдор Шомуродов фаолиятини Истанбулнинг бошқа жамоасида давом эттириши мумкин. Бу ҳақда Fotospor.com нашри хабар бермоқда.
Манбага кўра, Туркия Суперлигасида чемпионлик учун кураш олиб бораётган “Фенербаҳче” Шомуродовни трансфер қилиш масаласида “Башакшеҳир” билан музокара ўтказган. Истанбул клуби футболчи билан хайрлашишга қарши эмас, бироқ Элдорнинг трансфери учун 20 миллион евро талаб қилмоқда.
“Башакшеҳир” Шомуродов трансфери учун жами 5,7 миллион евро сарфлаган. Клуб мавсум бошида футболчини 3 миллион евро эвазига “Рома”дан ижарага олган эди. 2026 йил февраль ойида шартномадаги 2,7 миллион еврога сотиб олиш банди фаоллаштирилган. Шунингдек, келишувга кўра, футболчининг кейинги трансферидан олинадиган фойданинг 10 фоизи “Рома”га берилади.
Айни пайтда “Фенербаҳче” Туркия чемпионати турнир жадвалида 46 очко билан 2-поғонани эгаллаб турибди. Клуб етакчи “Галатасарой”дан 3 очкога ортда қолмоқда. Сентябрь ойидан бери жамоани германиялик Доменико Тедеско бошқариб келади.
Маълумот учун, Элдор Шомуродов 2025 йил ёзидан буён “Башакшеҳир” сафида тўп суриб келмоқда. Ҳужумчи шу вақтга қадар клуб таркибида 29 та учрашувда майдонга тушиб, 15 та гол ва 5 та ассист қайд этган. Айни пайтда у Туркия Суперлигасининг энг яхши тўпурари бўлиб, чемпионат доирасида 14 та гол ва 4 та ассист муаллифига айланган.
