Ўзбекистон терма жамоаси ҳамда “Башакшеҳир” ҳужумчиси Элдор Шомуродов Туркия чемпионати тўпурарларидан бири бўлиб турибди. 16-турдан кейин футболчи ҳисобида 11 гол ҳамда 2 та голли узатма мавжуд.
Шомуродов 14 декабрь, якшанба куни бўлган “Самсунспор”га қарши учрашувда ўз ҳисобига битта гол ҳамда битта голли узатма ёздириб қўйди. Ўзбекистонлик ҳужумчининг асосий рақобатчиси бўлган Пол Онуачу ҳисобида ҳам шунча гол мавжуд, аммо нигериялик футболчи ассистлар (1 ассист) бўйича Шомуродовга имкониятни бой бермоқда. Айни пайтда мазкур икки футболчи Туркия чемпионати тўпурарлар рўйхатида етакчилик қилмоқда.
“Галатасарой” ҳужумчиси Мауро Икарди эса 8 гол билан кейинги поғонадан жой олган. Найир Умут, Темми Абраҳам ҳамда Юсуф Эн-Несире каби футболчилар эса ўз ҳисобида 7 тадан гол ёздириб қўйган. Туркия чемпионатининг энг қиммат футболчиси Виктор Осимхен ҳисобида эса 6 та гол мавжуд.
Маълумот учун, Туркия Суперлигасининг 16-туридан ўрин олган “Самсунспор” ҳамда “Башакшеҳир” ўртасидаги баҳсда меҳмонлар 2:0 ҳисобида ғалаба қозонди. Айни пайтда Истанбул клуби 20 очко билан Туркия чемпионати турнир жадвалида 9-ўриндан жой олган.
