Тошкент шаҳрида уйида 13 килограмм афюн ва 7 килограммдан ортиқ наша сақлаган 58 ёшли эркак қўлган олинди. Бу ҳақда Давлат хавфсизлик хизмати хабар берди.
Қайд этилишича, “Хавфсиз ва соғлом юрт” тезкор-профилактик тадбирлари доирасида Давлат хавфсизлик хизмати ходимлари томонидан тезкор тадбир ўтказилган. Тадбир давомида 1968 йилда Сурхондарё вилоятида туғилган фуқаронинг Тошкент шаҳридаги вақтинча яшаш хонадони холислар иштирокида кўздан кечирилганда 13 кг 50 гр “опий” ва 7 кг 137 гр “гашиш” моддалари борлиги аниқланиб, ашёвий далил сифатида расмийлаштириб олинган.
Мазкур шахсга нисбатан ДХХ Тергов бошқармаси томонидан Жиноят Кодексининг 246- ва 273-моддалари билан жиноят иши қўзғатилган. Тергов ҳаракатлари доирасида унинг жиноий шериклари ҳамда наркотик моддаларнинг келиб чиқиш манбаларини аниқлаш бўйича тегишли тадбирлар амалга оширилмоқда.
ДХХ Тошкент шаҳар бўйича бошқармаси ва пойтахт ИИББ ходимлари ҳамкорлигида ўтказилган тезкор тадбирда эса виртуал наркоканал ташкил қилган 1991 ва 2000 йилда туғилган 2 нафар фуқаро ушланиб, улардан “гашиш” ва “гашиш мойи” олинган.
Маълум бўлишича, мазкур шахсларнинг бири Жиноят Кодексининг қатор моддалари билан муқаддам судланган, иккинчиси эса жорий йилнинг апрель ойида гиёҳвандлик воситалари билан ушланиб, ҳозирда гумондор сифатида терговга жалб этилган бўлган.
