Сурхондарё вилоятининг Термиз шаҳрида яширин таваккалчиликка асосланган онлайн қимор ўйинлари ташкил этган шахс аниқланди. Бу ҳақда Ички ишлар вазирлиги ахборот хизмати хабар берди.
Маълум қилинишича, 5 июль куни “Хавфсиз ва соғлом юрт” профилактик тадбирлари доирасида махсус тезкор тадбир ўтказилган. Унда Термиз шаҳрида яшовчи фуқаро ўз уйининг ертўласида яширин онлайн қимор бункери ташкил қилгани фош этилди.
Тинтув жараёнида жиноят жойидан 15 мингдан ортиқ ноқонуний билетлар, ютуқ рақамлари, махсус ўйин барабани, жараённи бошқаришда фойдаланилган компьютер ва телефон аппаратлари ҳамда банк пластик карталари ашёвий далил сифатида ҳужжатлаштириб олинган.
Аниқланишича, қимор ўйинлари билетларни онлайн сотиш орқали ташкил этилган бўлиб, ғолиблар тармоқ орқали махсус барабанда аниқланган. Иштирокчиларга пул ва автомашина ютуқлари ваъда қилинган. Ҳозирда мазкур ҳолат юзасидан қонуний чоралар кўрилмоқда.
