Тошкент шаҳрида ажрим учун судга берган оилаларнинг ярмидан ортиғи яраштирилди. Бу ҳақда ЎзА хабар берди.
Шаҳар фуқаролик ишлари бўйича туманлараро судлари томонидан 432 минг 132 та иш кўриб чиқилган бўлиб, бу республика бўйича кўрилган ишларнинг 26,8 фоизини ташкил этди.
Тошкент шаҳар суди фуқаролик ишлари бўйича судлов ҳайъатида 2 420 та апелляция, 1 мингдан ортиқ кассация ва 1 мингдан зиёд тафтиш шикояти кўриб чиқилди.
Апелляция ва кассация инстанцияларида кўрилган 3,5 мингга яқин шикоятнинг 2,5 мингга яқини ўзгаришсиз қолдирилган, 278 таси ўзгартирилган ҳамда 745 та суд ҳужжати бекор қилинган. Тафтиш инстанциясида эса 928 та иш ўзгаришсиз қолдирилиб, 66 таси бекор қилинган, 19 таси ўзгартирилган.
Никоҳдан ажралиш билан боғлиқ 7 мингга яқин фуқаролик иши кўриб чиқилган бўлиб, бу ўтган йилнинг шу даврига нисбатан 468 тага кўпдир.
Уларнинг 3 мингга яқини ажрим билан якунланган, 3 784 таси эса яраштириш чораларини кўриш орқали сақлаб қолинган.
Оилаларни яраштириш бўйича жойларда учрашувлар мунтазам ўтказилиб, тарафларга вақт бериш ва маслаҳат ишлари йўлга қўйилган. Рад этилган ишлар юзасидан оила ва хотин-қизларни қўллаб-қувватлаш бўлимларига тегишли хатлар юборилган.
Ишларни кўриш жараёнида қонун бузилиши ҳолатлари бўйича 199 та хусусий ажрим чиқарилиб, ижро учун тегишли ташкилотларга юборилган.
Шаҳар судининг фуқаролик ишлари бўйича судлов ҳайъати ва туманлараро судларига 6 мингдан ортиқ мурожаат келиб тушган. Уларнинг 1,5 мингдан ортиғи оғзаки ва ёзма шаклда қабул қилинган, шундан 11,3 фоизи сайёр қабулда, қолган 88,7 фоизи эса суд биноларида, почта ёки электрон тизимлар орқали олинган.
Ўзбекистонда 2025-йилнинг январь-сентябрь ойларида ФҲДЁ органларида 177 мингта никоҳ қайд этилган. Шундан шаҳар жойларида – 91,2 мингта, қишлоқ жойларида – 85,8 мингта никоҳ қайд этилган.
Никоҳлар сони йиллар кесимида қуйидагича (январь-сентябрь):
- 2021 йил – 206,8 минг
- 2022 йил – 197 минг
- 2023 йил – 184,5 минг
- 2024 йил – 179,4 минг
- 2025 йил – 177 минг.
Шавкат Мирзиёев раислигида ўтказилган видеоселектор йиғилиши 2025 йил бошидан буён 32 мингга яқин оила ажралиб кетгани маълум қилинган эди. 16 минг ота-она алимент тўлашдан бўйин товлаб келмоқда. Шунингдек, оиласи ва болаларини кредит қарзлари билан ташлаб кетиш ҳолатлари кузатилган. Шу билан бирга, ажримларда тарафлар, айниқса, фарзандлар оғир моддий аҳволга тушишининг олдини олиш учун никоҳ шартномаси тузишнинг афзалликларини тарғиб қилиш лозимлиги таъкидланган.
