Сурхондарёда молхонага чақалоғи билан бирга қамаб қўйилган аёл иши бўйича суд ҳукми ўқилди. Бу ҳақда Олий суд матбуот котиби Азиз Обидов хабар қилди.
Аввалроқ Узун туманида аёл ва унинг янги туғилган фарзандига нисбатан тазйиқ ва зўравонлик ўтказилгани тўғрисида хабарлар вилоят ИИБ томонидан ўрганиб чиқилганди.
Аёл эри ва унинг қариндошлари томонидан тилида нуқсони борлиги, фикрларини тўлиқ баён қилишга қийналишидан фойдаланиб, бир неча ой давомида 5 ойлик ўғли билан молхонада сақлаб келинган.
Ушбу ҳолат юзасидан жиноят ишлари бўйича Узун туман судининг ҳукми билан 1981-йилда Сурхондарё вилоятида туғилган эркак Жиноят кодексининг 126-1, 127, 25,135 ва 138-моддаларида (оилавий зўравонлик, вояга етмаган шахсни ғайриижтимоий хатти-ҳаракатларга жалб қилиш, одам савдоси, зўрлик ишлатиб ғайриқонуний равишда озодликдан маҳрум қилиш кабилар) айбдор деб топилган.
Шу билан бирга, 1975-йилда Сурхондарё вилоятида туғилган М.Ш., 1978-йилда туғилган К.Ш. ҳамда 1951-йилда туғилган З.А. кодекснинг 104, 127, 25,135 ва 138-моддаларида (одам савдоси, зўрлик ишлатиб ғайриқонуний равишда озодликдан маҳрум қилиш, вояга етмаган шахсни ғайриижтимоий хатти-ҳаракатларга жалб қилиш, қасддан баданга оғир шикаст етказиш кабилар) айбли экани аниқланди.
Суднинг ҳукми билан А.Ш.га 13 йил, М.Ш. ва К.Ш.га 9 йил муддатга озодликдан маҳрум қилиш жазоси, З.А.га 5 йил муддатга озодликни чеклаш жазоси тайинланди.
