Қашқадарё вилоятида ўзининг вояга етмаган фарзандини 45 минг долларга сотмоқчи бўлган эр-хотин 3 йилга қамалди.
Маълум бўлишича, 1988-йилда туғилган Т.Э.нинг аввалги турмушидан 2011 йилда туғилган ўғил фарзанди бўлган. У кейинчалик 2019 йилда М.Э. билан оила қуриб, яна бир фарзандли бўлган.
Суд мажлисида оила бунга мажбурликдан қўл урганини айтган.
“Пул топишнинг ҳар қандай йўлини изладик. Охири эр-хотин маслаҳатлашиб катта ўғлимизни сотиб, қарзлардан қутулишга келишдик. Кейин бу ҳақда танишимга айтдим”, дейди Т.Э. ўз кўрсатмасида.
Шундан сўнг судланувчининг таниши орқали Сурхондарё вилояти Ангор туманида болани олишга рози бўлган харидор топилган.
2025 йил 8 август куни эр-хотин фарзандлари билан Ангор туманига борган. Томонлар 14 ёшли бола учун дастлаб 30 минг доллар, орадан 15 кун ўтгач, яна 200 млн сўм беришга келишган. Харидор ўша ернинг ўзида пулни берган. М.Э. пулни санаганида бир оз кам чиққан. Аёл кам чиққан пулнинг ўша қисмини турмуш ўртоғи юборишини айтган.
Шу пайт хонага 5-6 нафар ички ишлар органлари ходимлари кириб келган. Ангор туман ички ишлар бўлими тезкор гуруҳи томонидан ўтказилган тезкор тадбир давомида М.Э. ва Т.Э.лар ўзларининг вояга етмаган фарзанди учун кимёвий ишлов берилган пулларни олган вақтида ушланган.
Судда М.Э. айбига иқрорлик билдириб, у фарзандини сотиш фикри турмуш ўртоғидан чиққанини, бу қарорга эса оилавий қийинчилик ва қарзлар сабаб бўлганини айтган. Т.Э. ҳам эрининг фикрларини тасдиқлаган.
Судда сўроқ қилинган 14 ёшли фарзанд эса онаси ва ўгай отаси уни бошқа оилага сотмоқчи эканини олдиндан айтгани ва ўзи бунга рози бўлганини билдирган. Бола ота-онаси қийналгани учун бундай ишга қўл урганини айтиб, уларга нисбатан даъвоси йўқлигини ва суддан енгиллик беришни сўраган.
Жиноят ишлари бўйича Термиз туман суди ота-онани Жиноят кодексининг 135-моддаси 3-қисми “б” банди (одам савдоси ) билан айбдор деб топган. Уларга Жиноят кодексининг 57-моддасини қўлланиб, ҳар бирига 3 йил муддатга озодликдан маҳрум қилиш жазоси тайинланган.
