Самарқанд автомобиль заводи МЧЖ ҚК устав капиталидаги 75,2 фоиз давлат улушини хусусийлаштириш якунлангани билдирилди. Бу ҳақда Давлат активларини бошқариш агентлиги хабар қилди.
Аввалроқ ушбу корхонанинг давлатга тегишли қисмини Туркиянинг Anadolu Group таркибидаги Anadolu Isuzu компаниясига сотиш бўйича келишувга эришган эди.
Инвестор томонидан 80 миллион доллар сотиб олиш тўловидан ташқари корхонани ривожлантириш мақсадида лойиҳанинг техник-иқтисодий баҳолаши натижасида шакллантирилган хулоса ва тавсиялар асосида қўшимча 80 миллион доллар инвестиция киритишига келишилган.
Битимни амалга ошириш учун Туркияда тегишли тартибга солувчи органларидан барча зарур рухсатномалар олиниб, SamAuto устав капиталидаги 75,2 фоиз давлат улушини сотиб олиш бўйича жорий йил 19 ноябрь куни олди-сотди шартномаси имзоланди ва 9 декабрь куни харид тўлови агентликнинг Хусусийлаштириш жамғармасига келиб тушган.
Шундан сўнг Хусусийлаштириш жамғармасидан 1 триллион сўм миқдордаги маблағлар жорий йил 10 декабрь куни бюджетга ўтказиб берилган. Шунингдек, инвестиция шартномаси расмийлаштирилади.
