Ҳиндистон назоратидаги Жамму ва Кашмир иттифоқ ҳудудида маҳаллий ҳокимият минтақанинг барча туманларида VPN хизматларидан фойдаланишни расман тақиқлади Бу ҳақда Зее News хабар берди.
Таъкидланишича, ушбу чора террорчи гуруҳлар ва уларнинг ҳамтовоқлари ўртасидаги яширин алоқаларни тўхтатишга қаратилган.
Миллий хавфсизликни таъминлаш бўйича кенг кўламли кампания доирасида ҳуқуқ-тартибот органлари аллақачон юзлаб фуқароларни текширувдан ўтказган. Натижада 800 га яқин киши тақиқланган иловалардан фойдалангани учун сўроққа чақирилган.
Туман ҳокимлари томонидан чиқарилган фармойишлар Кашмир водийсининг барча ўнта туманини, шунингдек, Жамму минтақасининг бир қатор туманларини қамраб олади. Расмий ҳужжатларга кўра, тақиқ мунтазам узайтириш имконияти билан икки ойлик муддатга жорий этилади. Бундай қарорнинг асосий сабаблари сифатида киберхавфсизликка, жамоат тартибига таҳдидлар ва чет элдаги раҳнамолар билан алоқа қилиш учун VPN’дан давлатга қарши кучлар томонидан фойдаланиш хавфи кўрсатилган. Қоидаларга риоя этилишини назорат қилиш тармоқлар мониторинги, мобил қурилмаларни танлаб текшириш ва дастлабки FIR баённомаларини рўйхатга олиш орқали амалга оширилади.
Кашмир дивизион комиссари Аншул Гаргнинг тушунтиришича, хавфсизлик соҳасидаги вазият жуда беқарор бўлиб қолмоқда, бу эса полиция ва маъмуриятдан тезкор чоралар кўришни талаб қилади.
Унинг сўзларига кўра, сўнгги пайтларда аноним тармоқлардан ноқонуний фаолият учун фойдаланиш ҳолатлари кўпайган, шу боис чекловларни жорий этиш тўғрисидаги қарор BNS қонунчилиги қоидалари асосида қабул қилинган.
Гаргнинг таъкидлашича, чора вақтинчалик бўлиб, фақат ҳуқуқ-тартиботни таъминлаш ва жиноий унсурлани жавобгарликка тортишга қаратилган, агар вазият барқарорлашса, чекловлар муддатидан олдин бекор қилиниши мумкин.
Хавфсизлик кучлари вакилларининг айтишича, разведка маълумотлари “ердаги ишчилар” ва террорчилар тарафдорлари кузатувдан қочиш учун VPN хизматларидан фаол фойдаланаётганини тасдиқлайди. Тақиқ нафақат жангариларнинг алоқа каналларини ишдан чиқаришга, балки террорчиликка қарши операциялар пайтида таҳқирловчи ёки чалғитувчи мазмун тарқалишининг олдини олишга қаратилган. Ҳукумат сабаблар келтирганига қарамай, бу ташаббус мухолифатнинг танқидига учради.
