Душанба, 19 январь куни жаҳон бозорларида олтин ва кумуш нархлари навбатдаги энг юқори чўққисига чиқди. Бунга АҚШ президенти Дональд Трампнинг Гренландия устидан назорат ўрнатиш масаласида Европа давлатларига қўшимча божлар жорий этиши сабаб бўлди. Бу ҳақда Reuters хабар берди.
Инвесторлар бундай геосиёсий қалтис вазиятда ўз маблағларини хавфсиз активларга йўналтирмоқда. Гринвич вақти билан 19 январь соат 05:51 ҳолатига кўра, олтиннинг спот (амалдаги) нархи 1,6 фоизга ўсиб, бир унция учун 4 666,11 долларни ташкил этди (энг максимал нарх 4 689,39 долларгача кўтарилган). Февраль ойида етказиб бериладиган олтин фьючерслари эса 1,7 фоизга қимматлаб, бир унцияси учун 4 671,90 долларга етди.
Кумуш нархи ҳам кескин ўсишни қайд этди. Spot кумуш нархи 3,6 фоизга ошиб, бир унция учун 93,15 долларни ташкил қилди. Аввалроқ қимматбаҳо металл рекорд даражадаги 94,08 долларлик кўрсаткични қайд этган эди.
Гренландия можароси ва тарифлар
Трамп 17 январь куни Даниянинг Арктикадаги улкан ороли — Гренландияни АҚШга қўшиб олишга қарши саккизта Европа давлатларига 10 фоизлик савдо божи қўллаган эди. Унинг айтишича, чора февраль ойидан кучга киради ва июнга бориб, 25 фоизга кўтарилади. Бунга жавобан Европа Иттифоқи элчилари, агар ушбу божлар кучга кирса, муносиб жавоб чораларини кўришга тайёрланмоқда.
“Геосиёсий воқеалар олтин нархининг ўсишига туртки бўлди. Трампнинг таҳдидлари ҳақиқатга яқин ва бу ҳаттоки НАТОнинг парчаланишига ҳамда Европадаги сиёсий мувозанатнинг бузилишига олиб келиши мумкин”, деди StoneX катта таҳлилчиси Метт Симпсон.
Ушбу хавотирлар фонида АҚШ фонд фьючерслари ва доллар курси пасайиб, инвесторлар олтин, иена ва швейсария франкига кўпроқ қизиқиш билдирмоқда. ОCBC стратеги Кристофер Вонгнинг таъкидлашича, кумуш нархи тақчиллик ва барқарор саноат талаби туфайли ўсмоқда. Унинг қайд этишича, олтин-кумуш нисбати 2025 йил охиридаги 105 кўрсаткичидан 50 гача пасайган, бу эса кумушнинг олтиндан кўра жадалроқ ўсаётганини кўрсатади.
Маълумот ўрнида, бошқа қимматбаҳо металлар, жумладан, платина спот нархи 0,6 фоизга ошиб, унция учун 2 341,08 долларни ташкил этмоқда. Палладий эса 0,1 фоизга қимматлаб, 1 801,87 долларга етди.
