Япониянинг шимоли-шарқий ҳудудида 12 декабрь куни 6,7 магнитудали кучли зилзила содир бўлди. Бу ҳақда Reuters хабар берди.
Япония метеорология агентлиги 1 метргача бўлган цунами тўлқинлари эҳтимоли ҳақида огоҳлантириш эълон қилди. Зилзила маҳаллий вақт билан соат 11:44 да Аомори префектураси қирғоқларидан 20 километр чуқурликда содир бўлган. 8 декабрь куни кечқурун худди шу ҳудудда 7,5 магнитудали кучлироқ зилзила кузатилганди. Ер силкинишлари оқибатида 34 киши енгил тан жароҳати олган. Айрим йўллар ва биноларга зарар етган.
Шунга қарамай, ҳукумат аҳолини кучли зилзила юз берса, 2011-йилдаги фалокатга ўхшаш оқибатларга тайёр бўлишга чақирмоқда. Ўша фожиада қарийб 20 минг киши ҳалок бўлган эди. Расмийлар бир ҳафта ичида 8 магнитудали ёки ундан кучли зилзила хавфи ошганини таʻкидлаган. Айниқса, қирғоқбўйи ҳудудларида яшовчилар тайёр туришга чақирилган.
2024 йил ёзида Япониянинг Тинч океани бўйлаб жанубий қирғоқларида жойлашган Нанкаи жарлиги (океан тубидаги чуқур сейсмик ҳудуд) учун ҳам шундай мегазилзила огоҳлантириши берилганди. Бироқ огоҳлантиришнинг аниқ тушунтирилмагани озиқ-овқатни ваҳимада харид қилиш, тадбирларнинг бекор қилиниши ва айрим бизнесларнинг ёпилишига олиб келган.
