АҚШ ҳарбийлари 3 февраль куни Араб денгизида Эроннинг Shahed дронини уриб туширди. Бунга унинг АҚШ авиаташувчи кемасига “тажовузкор тарзда яқинлашгани” сабаб бўлган. Бу ҳақда BBC хабар берди.
уАҚШ Марказий қўмондонлиги вакили капитан Тим Ҳокинснинг маълум қилишича, дронни уриб туширишга F-35C русумли яширин қирувчи самолёт жалб этилган. У Абраҳам Линкольн авиаташувчи кемасидан ҳавога кўтарилган. Шу тариқа қирувчи самолёт “авиаташувчи кема ва шахсий таркибни ҳимоя қилиш мақсадида“ нишонни йўқ қилган.
More storiesДрон кемага “номаълум мақсадда” яқинлашган, бу пайтда АҚШ кемаси Эрон қирғоқларидан тахминан 500 мил узоқликда (салкам 805 км) бўлган. Ҳодиса оқибатида АҚШ ҳарбий техникасига зарар етмаган, ҳарбий хизматчилар жабрланмаган”, дейилади хабарда.
Бу воқеа АҚШ минтақадаги ҳарбий иштирокини кучайтиришда давом этаётган, Вашингтон ва Теҳрон ўртасидаги таранглик юқори бўлиб турган бир пайтда юз берди. АҚШ президенти Дональд Трамп Эрон ядровий дастурини чеклаш бўйича келишув юзасидан музокараларга рози бўлмаса, унга қарши ҳарбий чоралар кўриш билан таҳдид қилган.
У аввалроқ Эрондаги норозилик намойишчилари қатл этилса, вазиятга аралашиш эҳтимолини ҳам инкор этмаганди. Шу сабабли Яқин Шарқ томон қирувчи самолётлар жойлаштирилган Абраҳам Линкольн кемаси юборилган.
Эрон дрони уриб туширилганидан сўнг Оқ уй матбуот котиби Керолайн Левитт Fox News телеканалига берган интервьюсида АҚШ ва Эрон ўртасидаги музокаралар шу ҳафтанинг охирига режалаштирилганича қолаётганини айтди. Унинг сўзларига кўра, Трамп “аввало дипломатияни танлаш тарафдори”, бироқ у “ҳар доим барча вариантларни, жумладан ҳарбий куч ишлатишни ҳам стол устида сақлайди”.
Эрон олий раҳнамоси Оятуллоҳ Али Хоманаий аввалроқ мамлакатга қилинган ҳар қандай ҳужум “минтақавий уруш”га сабаб бўлишидан огоҳлантирган. Мамлакат президенти Масъуд Пезешкиён 3 февраль куни АҚШ билан музокараларни бошлашни буюрган, Ҳозирда Эрон расман дрон ҳодисасига муносабат билдиргани йўқ.
Эроннинг Tasnim ахборот агентлиги масаладан хабардор бўлган номаълум манбага таяниб, халқаро сувларда Ислом инқилоби қўриқчилари корпусига маълумотларни “муваффақиятли” етказган дрон билан алоқа узилганини маълум қилди.
